FRAGMENTO

Horizontes del saber I
May unay ñawpaqkunaraqsi, Lambayeque suyupa chalankunamansi
achka wamp’ukuna chayasqa. Chay wamp’ukunapa umalliqninsi huk
hatunkaray runa Naylamp sutiyuq kaq kasqa, warmintaqsi Ceterni sutiyuq
kasqa. Paykunaqa achka soldadoyuqtaq achka kamachinpi puriqniyuqtaqsi
chayamusqaku. Huk willakuymi kan, chaymi paykunamantaqa kayhinata
nin: Naylampqa, chay hamuysiq runankunapas “hatunsi sayayninmanqa
kasqaku, q’illu chukchayuqtaq, anqas ñawiyuqtaqsi” kasqaku.
Chayraykutaqmi runaqa nin “chaykunaqa Europa allpakunamanta qallariy
pachapi kay Hurin Americaman chayamuqkunam kanman” nispa.
Chay wamp’ukunaqa Faquisllanga sutiyuq mayupa punkunpis sayanman
karqan, chay hawataq kunanqa Lambayeque sutiyuq qhipapun.
Kay chayraq chayamuq runakunaqa 2 waranqa thatkiyta puririspa chaypi
tiyananku wasitapas, apunku Chot sutiyuqpa wasintapas hatarichinku.
Chay wasipis huk much’ana wakata sayachinku, chay wakaqa Naylamp
umalliqpa rantinsi, ichaqa sutiyasqakutaq “Yampallec” nispa. Kay
sutimantas Lambayeque simiqa ñuqanchikkama hamun.
May ñawpaqmantaraq, Jesucristomantapas 9 pachak wata ñawpaqraqsi,
chay allpapiqa reino Sican sutiyuq hatun munayniyuqkunata Naylampqa
paqarichisqa. Kay sapan kamachikuq runa wañuptinsi wawankunaqa
“apum taytanchikqa” nispa kamachikusqaku. Paykunas runamanqa nisqaku
“Naylampqa wiñay wiñaypaq mana wañuqmi, payqa hatun rapranta
maywispam hanaq pachaman rin” nispas rimasqaku.
Naylamp sutiyuq runapa chay panaka paqarichisqanqa chay Lambayeque
qhapaq yunkakunapis waranqa tawa pachakniyuq watakunakama
kamachikusqaku. Qhipamansi chay allpakunapiqa Chimú kallpasapa
runakuna atispa chaykunapi kamachikapusqaku.
49