View/Open

4.4 SKINNERSTRAAT
17
Skinnerstraat is vernoem na William Skinner wat hom na 1852 in die
Transvaal gevestig het. Saam met die Devereux-broers het hy onder
andere Andries Pretorius se plaashuis gebou, Kerkplein help uitmeet
met J Visage (kyk Visagiestraat) en die eerste kerk, tronk, skool en
Raadsaal opgerig. Hy was ook Stadsraadslid en landdros vanaf
1867 tot 1878 (Andrews & Ploeger gee ander datums).
Daar heers steeds onsekerheid oor die toekomstige voorkoms van
hierdie straat waarvan die noordewand vanaf Du Toitstraat en die
Apiesrivier weggeskil is om die agterkante van geboue in
Schoemanstraat bloot te lê. 'n Nuwe wand, langs 'n nuwe straat sal
hopelik die wond herstel. Aan die suidekant, wat blykbaar nie deur
die straatverbreding geraak sal word nie, is daar 'n kort stukkie met
belangrike stadsweefsel wat die straat as ruimte begrens, landmerke
geword het en geskiedenis in pag hou. Hier is die Cathedral of the
Sacred Heart en Loreto Convent alles binne een blok.
Aan die westekant draai die straat tussen die bome langs
Steenovenspruit weg na Mitchellstraat in Pretoria-wes. Bron:
Andrews & Ploeger (1989); Beyers (1987).
ADRES Skinnerstraat 149, h/v Bosman
ERFNOMMER 2960 – Blok 14
HUIDIGE GEBRUIK Kerk: Cathedral of the Sacred Heart
Rooms-Katolieke katedraal teruggesit vanaf die straathoeke om 'n
voorplein teen Skinnerstraat en 'n klein ommuurde tuin teen
Bosmanstraat te maak. Buitemure is met terrazzoteëls beklee wat
aan die gebou 'n eenvormige tekstuur en kleur – in nabootsing van
sandsteen – verleen. Die dubbele hoofingang is aan die noordekant
tussen twee stomp torings waarop piramidale spitspunte en onder 'n
verdeelde glasvenster wat die voorgewel oorheers.
Die fasades is geleed deur middel van vertrappende steunbere wat
tot by die daklyn, wat met lyswerk en blinde boë versier is, klim.
Tussen die bere is hoë puntboogvensters waarin twaalf aspekte van
Christus se lewe in loodglas uitgebeeld word. Dit is 'n swaar
introspektiewe gebou wat die buitelewe afsluit.
Die katedraal is in 1932 (argiteksplan) tot 1933 (hoeksteen) opgerig
na die ontwerp van BJ Clinch wat in 1950 ook die kruisbeuk
aangebou het. Die huidige noordaansig dateer vanaf 1965 en is die
werk van G Mark Hussey, Van Rensburg en Assosiate. Hulle het ook
'n galery en bieghokkies in die noordelike gedeelte ingerig – wat 'n
klein ingangsportaal met lae plafon tot gevolg het. Van hier 'n trap na
die galery.
Die binneruimte is hoog en oop, mure is van rooi sandsteen en die
swaar plafon van hout. Ook aan die suidekant is 'n groot glasvenster
waarin die kruisiging uitgebeeld word. Die altaarruimte is verhoog;
hiernaas is die Maria-kapal. Die doopvont staan in die oostelike punt
van die kruisbeuk. Die Katedraal is 'n stedelike landmerk langs
Skinnerstraat. Bron: Planafdeling, Stadsraad van Pretoria.
ADRES Skinnerstraat 105
ERFNOMMER 2923 – Blok 14
HUIDIGE GEBRUIK Skool: Loreto Convent