View/Open

4.6 MINNAARSTRAAT
24
Die westelike strek van die straat begin teen Burgerspark en klim oor
die klein heuwelrug verby die museum en stadsaal tot waar dit fisies
by Schubartstraat deurgesny word. Die laaste deel vorm 'n kort,
feitlik ongebruikte verbinding tussen Schubart- en Potgieterstraat
waar alle orde deur latere voorsiening vir slegs die motorvoertuig
verwoes is. Die sterk straateenheid word deur die voltooide boomrye
aan weerskante gemaak – eerder as deur die geboue wat op
wisselende afstand van die straat geplaas is en langs oop terreine
en ommuurde parkeerplekke die verlangde straatwand breek.
Aandag is veral by die suidoostelike hoek met Bosmanstraat nodig
om die ware potensiaal van 'n mooi straat te verhef.
Dit is vermoedelik na JC Minnaar (1848 – 1913), die eerste
Registrateur van Aktes, vernoem. Bron: Andrews en Ploeger (1989).
ADRES Minnaarstraat 130
ERFNOMMER Deel van 900-905, 909-912 – Blok 19
HUIDIGE GEBRUIK Ongebruikte woonhuis.
'n Enkelverdieping woonhuis net terug van Minnaarstraat en van rooi
siersteen in Engelse verband op 'n siersteenplint en met siersteenskoorstene;
leiklipteëls op die skilddak. Houtskuiframe én staalvensterrame
agter houthortjies is gebruik, sowel as houtvloere
binne. 'n Projekterende stoep na die suide is later toegemaak met
houtrame en glas.
Die huis was tydens die era van die Royal Mint vir die Werkedirekteur
gebou. Dit staan tussen groot bome in 'n verwaarloosde
tuin wat herstel behoort te word. Naas 'n aanbouing op die noordwestelike
hoek is die huis se geheel ongeskonde en verdien dit om
gebruik te word.
ADRES Minnaarstraat 187, h/v Paul Kruger
ERFNOMMER 888,889,890 – Blok 21
HUIDIGE GEBRUIK Kantore vir Spoornet: NZASM-Gebou
'n Seweverdieping gebou met kelder, net weg van die sypaadjie en
met die straathoek weggesny. Dit is om twee binnehowe met die
ingange sentraal teen beide strate. 'n Streng vertikaliteit word op
fasade gesuggereer deur projekterende argitraaframe wat die lengte
van die gebou loop; hierin is vensters in horisontale bande.
Die gebou is in 1963 voltooi op die terrein van die ou NZASMhoofkantoor.
Die letters bo die ingang aan die noordekant is die
oorspronklikes wat van die ou gebou afkomstig is. Die huidige gebou
is van stedelike waarde daar dit deel vorm van die Paul Krugerstraatwand
van geboue. Tweedens is dit die enigste gebou suid van
Pretoriusplein wat poog om die oop ruimte te definieer deur dit te
stuit.