Eyvindur 2013

EYVINDUR • DESEMBER 2013 19
keppnisbúningi, Bjarni Rafnar og Ytra-Gilsbræður. Nokkrar efasemdir
eru um Guðlaug frá Hvammi. Áður voru uppi ágiskanir
um Erik Kondrup (1917-1998), Ara L Fossdal Björnsson (1907-
1965), sem var atvinnuljósmyndari, Jón Kjartansson frá Klúkum
(1913-1977) og jafnvel enn fleiri. Ekki er ljóst hvers vegna Ragnar
einn átti mynd, kannski leynast fleiri eintök í fórum afkomenda
hinna. Eitt er víst, að þarna hafa bjargast merkileg menningarverðmæti,
þökk sé afkomendum Ragnars Skjóldal. Hitt er einnig
ómetanlegt að einn úr fótboltaliðinu, Páll Rist, er enn á lífi og
man þessa tíma vel. Minnispunktar frá Páli eru uppistaðan í
þessari frásögn. Hann varð reyndar svo frægur að eignast með
árunum keppnisbúning á sig, en óvíst er hvort fleiri hafi náð svo
langt á framabrautinni.
En hvar æfði knattspyrnufélagið Örin á þessum árum? Páll
Rist upplýsir, að völlurinn hafi verið á lítt grónum mel austan
við Laugarborg, vestan þjóðbrautar. Þar var tiltölulega slétt og
stórgrýtislaust svæði, mörkin að norðan og sunnan. Það var ekki
fullkomlega lárétt alls staðar, miðjan ívið hærri en umhverfið og
hallaði þaðan til norðausturs. Aldrei þótti það tiltökumál. Hólmgeir
Þorsteinsson bóndi á Hrafnagili léði fótboltastrákum þennan
skika úr landi sínu og var það drengskaparbragð. Þeir komu
hjólandi til æfinga á kvöldin og undu glaðir við sitt. Þetta var í
rauninni eina afþreyingin sem var í boði fyrir lífsglaða unglinga á
þessum árum. Sennilega hafa einhverjir þeirra skolað af sér eftir
æfingar í nýbyggðri sundlauginni (án þess að fara í sturtu). Sá
ósiður var a.m.k þekktur í tíð undirritaðs.
Brynjólfur Ingvarsson eldri (Brynki á Snös).
Allar hugsanlegar skekkjur og missagnir eru á ábyrgð undirritaðs.
Ábendingar, leiðréttingar og athugasemdir eru vel þegnar.
Sími 8958255. Netfang: bringv@gmail.com
Myndir: Gunnar Örn Jakobsson Hvammstanga og Páll Ingvarsson
Reykhúsum
Heimildir: Páll Rist, Kristín S Ragnarsdóttir, Haraldur Hannesson í
Víðigerði, Jóhann Helgason frá Þórustöðum, Viktor A Guðlaugsson
o . fl .
Við endum þetta spjall með tveimur myndum af frekar öldruðum
sóknarmönnum úr liði Framtíðarinnar. Þeir eru að ,,taka
miðju” á gamla fótboltavellinum. (Brynjólfur Ingvarsson og Páll
Rist).
Ekki er laust við að gömlu framherjarnir séu fótboltalegir með
sig á myndinni og eflaust nýbúnir að rifja upp eldgamla meistaratakta.
Það eru 50-60 ár síðan þeir hittust síðast inni á fótboltavelli.
Brynjólfur Ingvarsson og Páll Rist.
Brynjólfur og Páll taka miðju.