Eyvindur 2013

30 EYVINDUR • DESEMBER 2013
Valgerður Jónsdóttir
U.M.F. Samherjar
Á Greifamótinu.
Starfsemi U.M.F. Samherja hefur verið í miklum blóma á þessu
ári, líkt og undanfarin ár. Félagið hefur leitast við að bjóða upp
á fjölbreytt starf fyrir íbúa sveitarfélagsins með það að markmiði
að glæða áhuga á heilsurækt og alhliða íþróttaiðkun.
Á árinu var undirritaður samstarfssamningur við Eyjafjarðarsveit.
Samningurinn tryggir félaginu árlegt framlag frá sveitarfélaginu
og leggur þannig grunninn að því fjölbreytta starfi sem
félagið stendur fyrir.
Handverkshátíðin hefur verið mikilvægasta fjáröflun félagsins
undanfarin ár, en þar leggja félaginu lið fjölmargir sjálfboðaliðar
bæði fullorðnir og börn. Íbúar sveitarfélagsins hafa ávallt sýnt
félaginu mikinn velvilja, hefðbundnar fjáraflanir eins og blómasala
fyrir Hvítasunnu ganga ávallt vel og blómasölufólki er alls
staðar vel tekið. Útgerðarfélagið Samherji ehf. veitti félaginu
styrk til eflingar barna- og unglingastarfs á árinu og var þeim
styrk varið til að greiða niður keppnisgjöld og ferðakostnað hjá
iðkendum félagsins.
Einnig gerði félagið á árinu samstarfssamning við Höldur ehf.
og var sá styrkur nýttur til kaupa á keppnisbúningum fyrir iðkendur.
Það er metnaðarmál félagsins að börn og unglingar fái að
kynnast sem flestum íþróttagreinum. Hjá Samherjum er hægt að
æfa allar þær greinar sem eru í boði og greiða bara eitt æfingagjald
sem er mjög í hóf stillt. Hér á eftir er fjallað stuttlega um
þær íþróttagreinar sem boðið er upp á hjá félaginu.
Badminton
Badminton er ein af vinsælli íþróttagreinum félagsins. Æfingar
eru í þremur aldurshópum og vill svo skemmtilega til að mesta
gróskan hefur verið hjá fullorðna fólkinu. Boðið er uppá sérstakar
æfingar í Miniton fyrir yngsta aldurshópinn (yngri en 8
ára) og hefur mæting verið allgóð á þær. Keppnishópur Samherja
í badminton hefur verið duglegur að taka þátt í mótum víðsvegar
um landið og er óhætt að segja að félagið státi af mörgum efnilegum
spilurum. Badmintonþjálfarar félagsins eru Ivan og Ivalu
Falck-Petersen.
Boltatímar
Í fyrravetur var tekin upp sú nýbreytni að bjóða uppá boltatíma á
veturna í stað hefðbundinna fótboltaæfinga innanhúss. Skemmst
er frá því að segja að þessi breyting hefur mælst mjög vel fyrir og
iðkendur fá nú að spreyta sig í ýmsum boltaíþróttum s.s. blaki,
handbolta, fótbolta, körfubolta, bandý o.fl. Á sumrin er svo boðið
uppá hefðbundnar fótboltaæfingar utanhúss. Mjög góð aðsókn
hefur verið í boltatíma í vetur og hefur Ásgeir Ólafsson séð um
þjálfunina.
Sund
Sunddeild Samherja hefur vaxið með hverju ári. Boðið er uppá
æfingar í tveimur aldursflokkum og hefur verið ágæt mæting
á æfingarnar. Eldri iðkendur hafa verið að taka þátt í ýmsum
mótum. Sundþjálfari í vetur er Anna Rún Kristjánsdóttir.
Frjálsar
Félagið býður uppá æfingar í frjálsum íþróttum jafnt að sumri
sem vetri. Æft er í tvískiptum aldurshópi og hafa iðkendur tekið
þátt í ýmsum frjálsíþróttamótum allt árið. Unnar Vilhjálsson
hefur séð um þjálfun í frjálsum íþróttum.