Eyvindur 2013

EYVINDUR • DESEMBER 2013 21
Björkin.
Furan.
byrjaði strax í september á því að börnin fóru í vettvangsferð í
námunda við Hrafnagilsbýlið og sáu þar kú eina og yfirgefna út
á túni. Í framhaldi af þessum fundi vöknuðu ótal spurningar sem
börnin vildu fá svör við. Hvað var kýrin að gera þarna alein í kuldanum?
Var hún týnd? Hver átti hana? Var einhver að leita hennar?
Rætt var um hvort börnin þekktu einhver ævintýri um kýr og
barst þá talið fljótt að sögunni um Búkollu. Þetta var sem sagt
kveikjan að verkefninu sem átti sannarlega eftir að vinda upp á sig.
Börnin vildu fara á bókasafnið og fá lánaðar bækur með sögum af
kúm. Ýmsar útgáfur af Búkollusögu voru fengnar að láni og lesnar.
Margvíslegar umræður og vangaveltur áttu sér stað. Sem dæmi
má nefna spurningar eins og hvers vegna var kýrin svo mikilvæg
í sögunni um Búkollu? Hvaða afurðir koma frá kúnum? Hvernig
eru þær framleiddar? Hvernig var lífið í „gamla daga“? Voru sömu
hlutir mikilvægir þá og nú? Hvers vegna fékk sögupersónan nýja
skó áður en hún lagði af stað að leita? Börnin fóru í heimsóknir í
Hrafnagil og fylgdust með mjöltum og fengu gefins mjólk í brúsa.
Þau fengu heimsókn frá Minjasafninu þar sem þau kynntust
áhöldum og aðferðum sem notaðar voru til að vinna úr mjólkinni
fyrir tíma mjólkursamlaganna. Í framhaldi af því bjuggu þau til sitt
eigið smjör og ost úr Hrafnagilsmjólkinni og notuðu á brauðið sitt
í nónhressingunni þann daginn. Mikil sköpun átti sér stað í verkefninu
þar sem börnin unnu ýmiskonar myndverk, sömdu sína
eigin útgáfu af sögunni og útbjuggu skuggaleikhús, máluðu með
foreldrum sínum myndir úr ævintýrinu á foreldradegi, sömdu
saman ljóð og leikþátt. Á uppskeruhátíðinni fluttu börnin ljóðin
og leikþáttinn. Þar voru margar Búkollur, skessur og karlssynir
og einfaldar og skemmtilegar tæknibrellur notaðar við að búa til
vatnið sem og að láta það hverfa þegar nautið svolgraði það allt í
sig. Eldurinn var líka áhrifamikill og mátti næstum heyra í honum
snarkið þegar börnin hristu „logana“ sína. Að lokum fengu gestir
að sjá skuggaleiksýninguna og hlýða á Búkollusögu barnanna
ásamt því að sjá skyggnukynningu á verkefninu. Nemendur og
starfsfólk fór stolt og ánægt heim eftir vel heppnaðan dag og þó
að það sé ferlið sjálft sem skiptir mestu máli í námi barnanna þá
er líka gaman og gagnlegt að fá til sín góða gesti, sýna starfið og
uppskera.
Úr Krummakoti sendum við öllum íbúum Eyjafjarðarsveitar
góðar óskir um indæla aðventu og gleðileg jól. Fyrir hönd starfsfólks,
Hugrún Sigmundsdóttir, leikskólastjórnandi.