Eyvindur 2013

36 EYVINDUR • DESEMBER 2013
uppástungu á einhverjum fjölmennum mannfagnaði í sveitinni
að stofnað verði hér sjúkrasamlag. Einnig gefa þær til ýmissa
annarra málefna er snerta líf og heilsu, svo sem 1938 til söfnunar
fyrir björgunarskútu fyrir Norðurland og 1939 til nýs sjúkrahúss
á Akureyri.
Svo skellur á stríð og setuliðið tekur yfir þinghúsið um tíma og
sett er á samkomubann svo nú er illt í efni með fjáröflunarsamkomur.
Á næsta áratug er farið að ráða vefnaðarkonu flesta vetur. Vefir
eru settir upp, gjarnan á tveimur stöðum í sveitinni og vefnaðarkona
ráðin sem vefur dívanábreiður, veggteppi, refla, dregla, púða
og gluggatjöld fyrir félagskonur. Veturinn 1945 kaupir félagið
vefstól vestan úr Stóru-Gilja á 900 kr. Einn veturinn er tiltekið
að ofnir hafi verið 143 m af gluggatjaldaefni úr efni frá Gefjuni á
Akureyri. Einnig voru haldin saumanámskeið og saumakennarar
ráðnir til þess að sníða og leiðbeina á þeim. 1945 voru sniðin 90
stykki alls á hálfum mánuði og var konum gert að greiða 2 kr.
fyrir hvert stykki til að kosta fæði og húsnæði saumakennarans.
Ýmis önnur málefni koma upp. Þó áðurtalin mál og einkum
skipulag á ýmsum samkomum félagsins sé hvað fyrirferðarmest.
Konur láta t.d. í ljós áhyggjur af drykkjuskap á samkomum í þinghúsinu
og fara þess á leit við hreppsnefnd að hún láni ekki þinghúsið
til félaga utan hreppsins.
Það er í rauninni ótrúlegt hvílík orka var til staðar á þessum
fyrstu árum meðal félagskvenna og oft fjörugar umræður um
ýmis mál.
Þegar farið var að byggja félagsheimilið Laugarborg sem vígt
var 1959 tóku félagskonur virkan þátt í því, bæði með sjálfboðavinnu
og fjárframlögum. Eftir vígslu Laugarborgar þurfti félagið
að standa undir afborgunum af sínum hluta lána sem tekin
voru til byggingarinnar og í því skyni var í samvinnu við ungmennafélagið
Framtíðina staðið fyrir dansleikjum í húsinu þar
sem vinsælar hljómsveitir voru ráðnar til að spila. Félagskonur
skiptust þá á að vinna í sjálfboðastarfi í veitingasölu helgi eftir
helgi auk þess að halda áfram öðru starfi. Auk þess hljóp mikill
kraftur í leikstarfsemi með bættri aðstöðu í Laugarborg og ásamt
ungmennafélaginu stofnaði það leikfélagið Iðunni sem setti upp
leiksýningar a.m.k. annað hvert ár, stundum árlega.
Í kvenfélagsferð um Eyjafjörð.
Þegar komið er fram yfir 1975 hefur starf kvenfélagsins tekið
nokkrum breytingum. Fundir voru nú venjulega einungis 3 á ári,
haustfundur, aðalfundur og vorfundur. Kvenfélagið starfaði náið
með ungmennafélaginu Framtíðin, hvað varðar leikstarfsemi og
ýmsar skemmtanir, svo sem haustball og þorrablót. Jólaball fyrir
fullorðna var að leggjast niður vegna lítillar aðsóknar og vaxandi
erfiðleikar voru að halda leikstarfsemi uppi vegna mikils kostnaðar
við leikstjóra og stundum dræma aðsókn en þó var sett upp
leikrit annað hvert ár. Bókað er í september 1976: „Kom fram að
aðsókn á jólaballið hefði verið léleg undanfarin ár, fólk væri upptekið
við að kýla vömbina hjá ættingjum og vinum og væri lítill
grundvöllur fyrir slíkum dansleik.“
En félagið stendur sjálft fyrir jólatrésamkomu fyrir börn og
tekur líka upp að bjóða eldri sveitungum til kaffisamsætis árlega.
Kvenfélagskonur láta til sín taka ýmis framfaramál og þjóðfélagsmál,
t.d. er send áskorun frá félaginu 1977 til hreppsnefndar
um að hún láti athuga um að keyra rusl frá bæjunum í sveitinni,
nokkrum sinnum láta konur í ljós áhyggjur sínar af því hve unglingarnir
í Hrafnagilsskóla sjáist illa á veginum í skammdeginu,
þær ákveða að hreinsa rusl í sjálfboðavinnu meðfram þjóðveginum
í gegnum sveitina á hverju sumri og fá liðsstyrk hjá sveitarstjórn
til þess að láta eitra fyrir njóla meðfram veginum. Konur
mótmæla bjórfrumvarpi sem er til umfjöllunar á Alþingi 1985,
þær álykta um ástand í símamálum og vegamálum í hreppnum
og einnig voru þær mótfallnar því að reist yrði álver í Eyjafirði.
Gönguhópur 2004. Helga með Iðunnarhúfuna.
Kvenfélagið gefur til ýmissa góðra mála á árunum frá 1975
– 2000, svo sem til tækja í sjúkraþjálfun við Kristnesspítala, til
fæðingardeildarinnar á Akureyri og gefa hlut í heitum potti við
Hrafnagilsskóla. En líka er unnið að eigin eflingu með ýmis konar
námskeiðum, þar má nefna leikfimi, matreiðslu og norska rósamálun.
Þá gróðursettu félagskonur skjólbelti syðst á lóð Hrafnagilsskóla
og plöntuðu trjám ofan við Hrafnagilshverfi. Settar
voru af stað vikulegar gönguferðir um sveitina yfir sumarið og
kvenfélagsferðalög að sumri voru fastur liður.
Staða kvenfélagsins núna er þannig að félagskonum hefur
heldur fækkað. Þær eru engu að síður bjartsýnar og ötular í því
sem þær taka sér fyrir hendur. Tilgangur félagsins er áfram að
láta gott af sér leiða. Það starfrækir sjúkrasjóð sem veitt er úr
til einstaklinga eða fjölskyldna í sveitarfélaginu sem eiga erfitt
vegna alvarlegra sjúkdóma eða slysa. Félagið gefur einnig til
annarra velferðarmála, t.d. tækjakaupa á sjúkrastofnanir í héraðinu.
Að öðrum þræði er tilgangur félagsins að efla samfélagið í
Eyjafjarðarsveit eftir bestu getu. Þar má nefna þátttöku í Handverkssýningunni
á Hrafnagili og að gleðja einstæðinga á öldrunarstofnunum
með jólagjöfum. Að lokum er félagið líka vettvangur
til að auka kynni og efla samheldni kvenna. Formlegir
fundir eru þrír á ári, að hausti, eftir áramót og að vori, gjarnan
súpufundir í hádeginu á laugardegi. Konum er skipt upp í vinnuhópa
sem vinna að afmörkuðum verkefnum og færast árlega á
milli verkefna þannig að öllum gefst kostur á að hafa áhrif. Fjáröflunarnefnd
sér t.d. um að gefa út dagatal með uppskriftum
árlega og rennur ágóði af því í sjúkrasjóðinn. Þess utan er árlega
skipulögð ferð fyrir félagskonur og eldri félagskonum er boðið