I. Joseph Pape - Sauerlandmundart

42
ET LEßTE HÄXENGERICHTE
1.
De Iärfdochter
Eger de Growe de Kliuse an der Landhecke kofte, harre dai en gans ander
Ansaihn ärre gitzund; do fehlere dai Däil nau derane, dai teleßt bugget ies,
un me soh vüär en graut Gebui met väier Toiern an den Ecken un doächter
op diän gans ollen Tauern met diän wunderligen Peylers un Finsters. Dai
was ok all tau diär Teyt nit viel anders ärre gitzund un nau höchter ärre dai
väier Toiern. Dai hiät dai väier Toiern, dai nit gans te Stanne kummen sind,
üewerliäwet.
De Kliusenwolds, dai vüärm Growen do Heer wören, het de Kliuse dem
Growen verkaupen moggt. Me vertellet siek gitzund men, et lustige Liäwen
wör schuld derane wiäst; dobey härren se iärk verbugget, se härren siek
bräit maken un et liuter grötter hewwen wollt, bit antleßte un eger se dai
väier Toiern unner Daak bracht härren, de Kasten lieg wiäst wör, un
nümmes mehr härre buargen wollt. De richtige Grund liet awer depper.
De Kliusenwolds wören Ganiärwen; Ganiärwen sind awer gebuarene
Tiäröppe. Kinner un Kinneskinner iärweren all gleyk, un de Kliusenwolds
Vedderskop wor graut. Un alles bläif tehaupe sitten un moggte van diäm
Gemainskopsiärwe liäwen. Dät do viel dertau genk, ies nit te verwünnern,
un dät se do viel anbuggen moggten, auk nit. Antleßte harren se niks mehr
ärre Schuld; do kräig de Growe, dai `t mäiste buarget harre, alles. Un dai
üewergen van diän armen Ganiärwen wören nau frauh derbey, dät se de
Growe, dai viel Güeder harre, in seyne Denste nahm, - mäist ärre Fürsters,
dann do verstönnen se iärk nau am besten op.
Men äiner ies derbey wiäst, diäm stont de Growendenst nit aan. Dai flaug
högger un hiät ok bolle seyn Glücke maket. Hai herre Maxmiljon, sau wasse
dem Lannesheren te Ehren doft. De kölsken Kurfürsten, diän tau diär Teyt
et Land nau hor, herren viel sau. Un beym kölsken Kur-fürsten, me
Nofolger van diäm, unner diäme doft woren, soll ok hai te Ehren kummen.