Dat Letzt - Quickborn. Vereinigung für niederdeutsche Sprache und ...

Rezensionen
gefalln looten. To düssen Wettkampf
findt sik nümms, man bloots Lüttje Jan,
een plietschen Knecht, de hett keen
Bangen vör den groten Riesen. Lüttje Jan
waard bannig utlacht för sien Snackeree
un Opsniederee, un keeneen glöövt,
dat he wirklich mit den Riesen tregg
waarn kann. Man schull he dat schaffen,
hett em sien Buur toseggt, dat he den
Hof kriegen schall – un de Dochter
glieks bobento. Un denn geiht dat ook
all los mit denn Wettstriet twüschen Grote
Jan un Lüttje Jan, un an ’n End winnt
natürlich – Lüttje Jan. (Is doch klor. Denn
dorför is de Geschicht ja ook een Märken.)
Man Lüttje Jan, so ’n lütten Deubel
is he ja ook! Nich bloots, dat he den Riesen
uttricksen kann bi jem ehrn Wettkampf,
to ’n Schluss hett he Grote Jan
sowiet, dat de Riese sik mit en scharp
Mess sogor sülbst den Buuk opsnieden
deiht. Dor is ’t denn natürlich vörbi mit
Grote Jan. Man Lüttje Jan, de kriggt achterran
sien Bruut, versteiht sik.
Dat Besünnere an dütt Book sünd wiss
twee Soken: To ’n een sünd dat de Biller
vun Holger Fischer, mit de he de
Geschicht wunnerbor illustreert hett.
För een Märken, dat vertellt ward, un
för een Kinnerbook, wo nich bloots, man
to ’e Hauptsook de lütten Jungs un
Deerns rinkieken schöllt, sünd de Biller
wiss dat allerwichtigste. Öberhaupt
is dat Book schön treggmookt: Dat
Kinnerbook mit 18,5 cm x 26 cm hett een
fasten Deckel, de Text is man kort; op
jedeen Sied gifft dat bloots een poor
Sätze. Wokeen mit dat ostfrees’sche
Platt nich unbedingt wat anfangen kann,
de kann den heelen Text vun dat Märken
an ’n End vun ’t Book ook nochmol
op Hochdüütsch nohlesen – good indeelt
för elkeen Sied.
64
De tweede Sook, de dat Book vun “Grote
Jan un Lüttje Jan” to wat Besünners
mookt, dat is de Geschicht, wie dütt
Märken öberhaupt entstohn is. Dat
steiht denn allns in den Anhang. Albrecht
Janssen hett de Geschicht
opschreeven un dorbi nich bloots sien
eegen Phantasie to Help hatt, man ook
an ole Märken un Motive dacht, de in
Ostfreesland un annerswo all jümmers
vertellt woorn sünd. 1922 is de Geschicht
to ’n iersten Mol in een Book afdruckt
ween un hett achterran ook bald
in Schoolböker in stohn. Miehr as 80
Johr lang is dat Märken so een vun de
Texten ween, de jümmers wedder för de
School utsöcht woorn sünd. Un dorüm
is “Grote Jan un Lüttje Jan” denn ook
so bekannt woorn in Ostfreesland, wiel
dat de Kinner düsse Geschicht all in ’e
School liert hebbt. Dat gifft wiss nich
veele plattdüütsche Texte, vun de man
sowat seggen kann.
Ik dink, mit “Grote Jan un Lüttje Jan” hett
de Jury vun de Bökermess dat richtige
Book tofooten kreegen un mit Recht as
dat best plattdüütsch Book vun 2006 uttekent.
Liekers, dat hett mi denn doch
wunnert: De Sook mit dat lange, scharpe
Mess un dat veele Bloot, wenn sik
Grote Jan sülbst över ’n Jordan bringt,
dat is meist ’n beten to brutal, dücht mi.
Sowat kummt normolerwies bloots in ’t
Kinnerprogramm vun ’t Fernsehn. Ik
heff nich dacht, dat dat sowat ook in een
ostfrees’schet Märkenbook to seihn
gifft.
Albrecht Janssen: Grote Jan un Lüttje
Jan. Illustriert von Holger Fischer.
Leer: Verlag Schuster 2006. 48 Seiten.
ISBN: 3-7963-0354-4.
Thomas Stelljes