Descarga en formato PDF (4 MB) - Centro Ramón Piñeiro para a ...

detén nunca: a cidade que deu vida á novela ve agora como a novela
dá vida á cidade, e a cidade que se alimenta daquela creación alimenta
á súa vez outras creacións.
Do mesmo xeito, Joyce está omnipresente na súa amada e odiada
cidade nativa, dende o busto en St. Stephen’s Green á estatua hiperrealista
en Earl Street, sen esquecer o contorno da capital, pois na próxima
torre de Sandycove, que leva o seu nome, existe un museo en
lembranza do seu axitado aloxamento nela. Polo demais, lugares
públicos e privados aluden ao seu nome ou ao dos seus personaxes
por toda Irlanda, dende a fonte dedicada a Anna Livia Plurabelle, personificación
joyceana do río Liffey que atravesa Dublín, á floraría
Molly Blooms.
Mais a insistente metaliteratura urbana e a simbólica bibliofaxia
irlandesa non se deteñen en Joyce e afectan a todos os grandes escritores
angloirlandeses, tan lidos e admirados por min dende moi novo.
Dende logo, non esquecín o encontro coa casa natal de Jonathan Swift,
nin a placa e o seu busto na catedral, nin o próximo edificio con curiosos
relevos inspirados en As viaxes de Gulliver. Non en van o primeiro
escritor irlandés que lin, xa na adolescencia, foi precisamente Swift, a
quen quizais seguira o tamén clásico e polifacético Goldsmith.
E, coa mesma óptica, gustei de ver a antiga vivenda de Yeats en
Merrion Square e o colorido monumento a Wilde en Merrion Square
Park, á beira da súa morada familiar, así como o museo e casa natal de
Shaw en Synge Street. Non moi lonxe, en Harcourt Street, morou Bram
Stoker e acaso o seu propio Drácula. E tampouco a Universidade
esquece a signalética literaria: unha placa lembra na Newman House
do católico University College a Hopkins como profesor e a Joyce
como alumno, mentres que no anglicano Trinity College outras placas
sitúan o Centro Samuel Beckett. O Bewley’s Cafe (Grafton Street), fundado
por cuáqueros, garda memoria de clientes como Yeats, Shaw,
Wilde, Joyce, O’Casey ou Beckett. E a todos eles e a moitos máis hai
referencias no interesante Museo de Escritores de Dublín. Porque a
capital de Irlanda foi tumba ou berce dos máis varios autores, dende
Lord Dunsany a Iris Murdoch.
260