F:\Botime Design Elvira\Librat - Arct

SHËNDETI MENDOR DHE TË DREJTAT E NJERIUT 41
3. Shoqërimi në polici i personave të lartpërmendur vinte në kundërshtim edhe me ligjin
nr. 9749, dt. 04.06.2007 “Për Policinë e Shtetit, respektivisht me nenin 100, sipas të cilit
punonjësi i policisë duhet të bëjë njoftim për paraqitje (me fletnjoftim apo verbalisht) për
të marrë informacion për të identifikuar shkelsit e mundshëm të ligjit. Si dhe me nenet 11/
6, 101 dhe 106 të ligjit “Për Policinë e Shtetit”, në të cilat parashikohet shoqërimi në polici
për shkaqe administrative i personave dhe rastet e shoqërimit. Mirëpo rasti konkret nuk
parashikohet në rastet e shoqërimit të personave në polici.
4. Nga punonjësit e policisë në momentin e shoqërimit dhe marrjes në pyetje në polici të
shtetasve të mitur nuk ishte vënë në dijeni psikologu ose pjestarë të familjes së tyre. Po ashtu,
pyetja e të miturve ishte bërë në orët e vona të natës duke u mbajtur në zyrat e Komisariatit të
Policisë nga ora 20.30 deri pas mesnatës së ditës tjetër. Këto mosveprime vinin në kundërshtim
me kërkesat e K.Pr.Penale të parashikuara në nenet 35, 37, 48 dhe 296/1.
5. Kallëzimi i shtetasit Q. I. ishte marrë më vonë se shoqërimi dhe pyetja e të miturve E.
Ll., B. M. dhe K. Sh., të cilët ishin marrë dhe pyetur para marrjes së kallëzimit.
6. Më datën 04.04.2009 shtetasit B. M. dhe K. Sh. janë pyetur në cilësinë e personit ndaj
të cilit zhvillohen hetime. Marrja në pyetje e shtetasit K. Sh. është kryer nga oficeri i
policisë gjyqësore P Z pa praninë e avokatit mbrojtës. Ndërsa shtetasi i mitur B. M. është
pyetur nga oficeri i policisë gjyqësore A T në praninë e avokatit jo të zgjedhur prej tij, por
të caktuar kryesisht nga policia gjyqësore. Ky veprim bie ndesh me nenin 296/1 të Kodit
të Proçedurës Penale.
7. U provua plotësisht se ndaj të miturve E. Ll. dhe K. Sh. ishte përdorur dhunë
fizike dhe psikologjike nga oficeri i policisë gjyqësore P Z.
8. Gjithashtu nga hetimi u provua se punonjësi i policisë P Z, i cili ka dhe atributet e
ofcierit të policisë gjyqësore, nuk kishte zbatuar me rigorozitet kërkesat e parashikuara në
Kodin e Proçedurës Penale, që bën fjalë për veprimtarinë e Policisë Gjyqësore, të
parashikuara nga nenet 293 deri në 303 të tij. Në këto nene përcaktohet qartë detyrimi i
oficerit të policisë gjyqësore që për çdo veprim të kryer duhet të njoftojë prokurorin.
Mirëpo në kundërshtim të plotë dhe të hapur me detyrimet e parashikuara në këto dispozita,
nga oficeri i policisë gjyqësore jo vetëm që nuk ishte vënë në dijeni prokurori për marrjen
e deklarimeve të personave të mësipërm në cilësinë e personave ndaj të cilëve zhvillohen
hetimet, por janë kryer dhe veprime të kundërligjshme duke ushtruar dhunë fizike e
psikologjike. Dhuna fizike ka qënë më e ashpër tek i mituri E. Ll. në trupin e të cilit,
sidomos tek shputat e këmbëve ishte goditur me mjete të forta.
Veprimet e kryera nga oficeri i policisë gjyqësore P Z, për marrjen në polici dhe
pyetjen e shtetasve të mitur E. Ll. dhe K. Sh. pa mbajtur procesverbal, përbëjnë
vepër penale, në rastin konkret atë të “Kryerjes së veprimeve arbitrare”,
parashikuar nga neni 250 të Kodit Penal. Vepra penale e mësipërme cënon
funksionimin e rregullt dhe normal të veprimtarisë shtetërore dhe prek lirinë e
shtetasve, pasi ata janë mbajtur në mjediset e Komisariatit të Policisë Dibër duke
mosrespektuar procedurat dhe garancitë ligjore.
Shoqërimi për disa ditë rresht në mjediset e Komisaratit të Policisë dhe ushtrimi i
dhunës fizike e psikologjike, duke i kërcënuar të miturit me futjen në burg, me
qëllim marrjen prej tyre të informacioneve apo të dhënave mbi ngjarjen, përmban
plotësisht elementët e veprës penale të “Torturës”, parashikuar nga neni 86, gërma
“a” të K.Penal. Kjo vepër penale rrezikon seriozisht jetën dhe shëndetin e shtetasve.
Ushtrimi i torturës ka qënë determinant në hedhjen e shtetasit E. Ll. nga kati i
tretë i Komisariatit të Policisë Dibër.