Der Burgbote 2007 (Jahrgang 87)

Do sin mer dann noh Wien jefloge,
dä Pitter, dä hat unjeloge
noch nix jewoss un nix jeahnt.
Dä Schnitzer-Floch dä wor jeplant
för nommedachs, su koot vor Drei,
de Schwierens woren och dobei.
Mer han allt em Hotel jewaad,
un han do unsre Spass jehat.
Se komen an, de Pooz jing op,
de Üwerraschung hät jeflupp.
Do staunte beidse Schnitzlers sehr:
wo kütt dann dat Ballett jetz her.
Se han jestrohlt un woren früh,
dä Pitter kräht die Muul nit zo.
Dä Schwieren fung de rächte Wööd,
Dozo han mer ne Sek jetröt.
Am eeschte Ovend jingk et dann,
wie mer et jo verspreche han,
zum Heurigen en e Lokal,
dat wor de allereeschte Wahl.
denn öm dat alles zo beluure,
do bruchste Zick, jo dat deit dore.
Doch hatte mer nit su vill Zick
allt Meddachs moote mer zoröck
un jingken met dä janzen Truppe
zum Griechenbeisel. En dem Schuppe
do hamer alle jot jemüffelt,
mäncheiner hät och jet jesüffelt.
Donoh, do war mer möd un satt,
dann jingk et widder en de Stadt.
Do kunnt jetz jeder all die Saache
die hä jän maache wollt och maache.
Ich han de Kaiserjruff jesin,
do wollt ich immer allt ens hin.
Donoh zom Cafe Sacher flöck
un do en Sachertaat verdröck.
Dann wood de Zick allt widder knapp
un dat Programm heelt uns op Trapp.
Jedusch un fein jemaat janz flöck,
un in et Opernhuus jejöck.
Do jov et rut un wiesse Wing,
un lecker Esse, vill un fing.
Op eimol wood et Hätz uns früh:
jetz jov et Musik noch dozo,
met Schrammeljitta un met Quetsch,
mer han uns Wigger jet gepetsch.
Dann kom en Sängerin, wie nett,
sei maaten Musik jetz zu drett,
de Sängerin sung laut un huh,
un als se ophört, wor mer früh.
Zwor jov et keine kölsche Tön.
Doch wor dä Ovend trotzdäm schön.
Dann jing et Wigger, Schlag op Schlag:
en Stadtrundfahrt am nöchste Dag
mem Bus un och ze Foß durch Wien,
do hamer wirklich vill jesin,
vill schöne Hüsjer, un Paläss,
un Hingerhöff. Doch dann et bess
dat wor dat „Schlössje" vun Schönbrunn.
Do hatte mer dann vill ze donn.
85