Nono, cuntame d'na volta... - hosted by PolesineInnovazione.it

- 73 -
El filo’ e
le fole
“Mi at l’impresto, basta che dopo a to m’porti do, tre fritele anca a mi!”.
La putina alora “ Si, si Barba, a ghel digo ala mama!”. La tole la padela
e la và a casa.
Allora so mama la impasta e dopo… Frisi e magna! Frisi e magna! Frisi
e magna! Frisi e magna! Insuma dopo chi à magna tutto a ghe gnù in
mente de Barba Sucon Suchela!
El dise: “Orca! Adesso cos’è c’ag portemo a Barba Sucon Suchela? A n’è
restà apena tre- quatro fritele!”. Allora la mama la va in stala, la ciapa un
baston, la taca a darghe pache a la musa e la musa la caga; dopo la mama
la la suna su e la la impana un fià. Insuma la mete ‘sta roba in t’un piato
insieme al fritele vere!
La putina la parte, la va da Barba Sucon Suchela: “Barba Sucon Suchela
a so gnù a portarte indrio la to padela!” .
“E le fritele?”.
“ Si, Barba Sucon Suchela! To el to piato de fritele!”.
“Speta c’a sento si è bone”. Alora el n’in magna una “Mmmm, che
bona!”, el n’in magna n’antra “Beeee, che cativa!! Mmmm, che bona!! “.
Pò n’antra “Beeee, che cativa!!”.
Insuma el s’el magna tute. Dopo un toco el dise “Ah! Chi a ghe qualcosa
c’a va mina ben! Stanote a vegno a magnarte! A to m’a imbroià!”.
La putina la core a cà, la ghel dise a so mama. “Mamaaa! Stanote Barba
Sucon Suchela l’a dito chel vien a magnarme perché le fritele le iera
mina bone!”.
Allora so mama la dise: “Valà! Valà! C’ag penso mi”.
La fa ‘na putina de stofa, de strase e spili, per far murire el Barba Sucon
Suchela, la la mete in neto dla putina e la g’dise: “ Ti vieni in neto cu
mi!”.
Alla sira at senti: ton, ton, ton! I pasi del Barba Sucon Suchela.
El cumissia a’ndar sur per la scala.
“Varda ca so chi, sul primo scalin!!”, el diseva intanto ch’el gneva su.