Əlamətdar və tarixi günlər təqvimi: 2008-cı il - Azərbaycan Milli ...

AŞIQ ŞƏMŞIR – 115
Şair-aşıq
Mart
15.03.1893-
10.02.1980
Şirin qoşmaları və aşıqlıq
sənətilə şöhrət qazanmış Şəmşir
Qurban oğlu Qocayev (Aşıq
Şəmşir) 1893-cü il mart ayının 15-
də Yelizavetpol (Gəncə)
quberniyasının Cavanşir qəzasının
(indiki Kəlbəcər rayonunun)
Dəmirçidam kəndində yoxsul
kəndli ailəsində anadan olmuşdur.
Şəmşirin atası Qurban istedadlı
şair, dövrünə görə bilikli,
məlumatlı və şöhrətli bir aşıq
olmuşdur. Ilk tərbiyəçisi və ustadı
atası Aşıq Qurban və Aşıq Ələsgər
olmuşdur.
1907-ci ildə Aşıq Şəmşirin
ailəsi indiki Kəlbəcər rayonunun
Ağdaban kəndinə köçmüşdür. O,
burada 1910-1914-cü illərdə çobanlıq
etmişdir. 1914-cü ildə saz
sənəti aləminə gəlmiş, müstəqil
aşıqlığa başlamışdır. 1920-ci ildə
Qamışlı kəndində yeddiillik
məktəbi bitirib, kənd sovetində
katib işləmişdir. 1930 və 1946-cı
illərdə Kəlbəcər rayon zəh-mətkeş
deputatları Sovetinə de-putat
seçilmişdir. 1938-ci ildə
Azərbaycan aşıqlarının II qurultayında
iştirak etmişdir.
Ilk mətbu qoşması «Aşığın
səsi» adlı şeirlər toplusunda
çap olunmuşdur. 1956-cı ildən
Şəmşirin şeirləri «Azərbaycan»,
«Ulduz» jurnallarında, «Kommunist»,
«Ədəbiyyat və incəsənət»,
«Azərbaycan gəncləri»
qəzetlərində müntəzəm dərc
edilmişdir.
Aşıq Şəmşirin üç dastanı,
iki yüzdən çox qoşması, yüzə
yaxın təcnisi, otuzdan çox deyişməsi,
iyirmi gəraylısı, iyirmidən
yuxarı bayatısı, on dörd ustadnaməsi,
yeddi divanisi, altı qəzəli,
dörd məsnəvi şəklində şeiri, bir
sıra dodaqdəyməz və diltərpənməzləri
vardır.
Aşıq Şəmşirin yaradıcılığı
həm məzmun, həm də forma
cəhətdən xeyli zəngindir. Aşığın
yaradıcılığında qoşma çox geniş
yer tutur. Bu qoşmalar Şəmşirin
yaradıcılığında nəinki say və
həcm etibarilə, həm də sənətkarlıq
cəhətdən başqa şəkildə
yazılmış şeirlərindən seçilir.