Kölner Stadtteilliebe Winter 2019

74 Koelner-StadtteilLiebe.de
Die Kölschgänger
waren wieder unterwegs
Wann mer üvver Baute en Kölle schriev, schriev mer off üvver
en Kirch ov jet, dat för der Kommiss gebaut woodt. Do es et
Johrhundert ech egal.
För e Beispill uns Rudekircher Autobahnbröck: Se es kein
Kirch, also muss et ene Kreegsbau sin. Wor jo och der Adolfes
Hitler, dä se 1938 en Opdrag gegovve hät. Hä broht en
Verbindung vun Oste noh Weste, öm Zaldate un Waffe flöck
transportiere ze künne. Un och wann et noch Johrzehnte
duure sollt, bes mer ene geschlosse Autobahnring krähte,
wor jo Kölle och e Drihkrütz för der Verkehr. Do wor die Rudekircher
Bröck ald wichtig, öm en Kölle flöck üvver der Rhing
ze kumme.
Dä Architek Päul Bonatz hatt de Plän för die Bröck ald parat.
Dä Ingenieur Karl Schaechterle un, als Bröckebauspezialiss,
der Fritz Leonhardt, dä se extra doför 1939 ganz flöck vun der
Front zoröck gehollt han, weil et jo ene strategische Bau för
der Kreeg wor, hatten et Regalt för die Konstruktuion.
Wat die drei do geschaffe han, hatt zo dä Zigg en Europa
keine Verglich. En echte Hängebröck, die zwesche de Pylone
378 Meter üvverspannt un rähts un links dovun och noch
94,5 Meter noh jeder Sigg. Dat sin zesamme 567 Meter Bröckeläng.
En Europa gov et su jet noch nit.
Dobei süht die Bröck jo och noch elegant us. Zomindes kann
mer dat vum Opbau, vun de Querbalke un Pylone sage. Die
drei Baumeister han genau üvverlaht, wievill Stohl se för der
Bröckekaste, de Pylone un de Seilcher bruche, die üvvrigens
vum kölsche Ungernemme Felten & Guilleaume kome. Domet
die Bröck stabil stonn kunnt, brohte se 6100 Tonne Stohl
– dat es nit vill. Dä Stil, die Idee, Baute elegant un leich wirke
ze looße, wor en Idee us de 1920’er Johre.
Et Fundament, de Verankerung en der
Ääd för der Opbau, wor ävver et Gägedeil.
Dat han se expré ärg massiv gebaut
un et Ussinn och noch met enem Mantel
us Muschelkalk verstärk. Dat wor de Idee
us de 30’er Johre, die us Monumentalbaute
der Nazi-Zigg kom. Am 20. September
1941 woodt de Bröck engeweiht.
Et stabile Fundament hät uns ävver och
ald zweimol ärg genötz: am 28. Januar
1945 es die Bröck engestürz, nohdäm se
vun Bombe getroffe woodt. Der Widderopbau
zwesche 1952 un 1954 fluppte
god, weil die aale Fundamente god en
Schoss wore. De Bombe hatte do winnig
kapodd gemaht, esu deck sin de Widderlager
unge.
Do sin mer beim nächste Punk. Nohdäm
mer die Bröck widder opgestallt hatte,
soh se immer noch elegant us. Mer hatt,
weil et Material met der Zigg noch besser
gewoode wor, nor noch 3350 Tonne
Stohl gebroht. Se wor ävver jo och nor 25
Meter breid. Ich weiß noch, wie mer uns
en de 80’er Johre dodrüvver gequält han. Do wor jo nit vill
Plaatz, weil der Verkehr luuter mih woodt. Jo, un 1994 wor se
dann dubbelt esu breid. An der nördliche Sigg vun der Bröck
kunnte mer einfach noch en Fahrbahn aanbaue, weil de
Basis esu stabil es - kei Problem. Selvs de Koste vun hügg 94
Millione Euro erschrecke mich als Kölsche nit…
Ävver woröm wor dä Plan ald do, wie der Hitler der Opdrag
gov? - Europa wor wigger, wie mer hügg denke! En Europa
wor die Idee, dat mer de Völker verbinge müsse, nit fremb. En
Stroßeverbindung vun London bes noh Istanbul för Minsche
un Ware, wollte mer för Europa han. Verbinge, nit bekreege,
dat wor der Senn.
Bes hügg es die Bröck wichtig för deVerkehr vun London üvver
Brüssel un Kölle bes noh Skandinavie, Italie un der Balkan.
Un wann mer üvverläht, wie off de 18 ens bes noh Istanbul
fäht, es et god, dat mer och mem Jöckemobil üvver de Rudekircher
Autobahnbröck kumme.
Üren Mechel
Carl-Spitzweg-Straße 3,
50999 Köln
Telefon: 0221 / 99 20 68 23
kanzlei@mikehomann.de
www.mikehomann.de
Mehr über die Kölschgänger finden Sie auf unserer Internetseite
und auf www.koelschgaenger.net
15 Jahre juristische
Kompetenz im
Kölner Süden.