Against communalism of the best-loser system - Lalit Mauritius

lepep Repiblik an-antye anmemtan ki ena dimunn ki krwar ki li Premye Minis akoz so idantite
kominal.
Sitwayin so sor parey kuma Premye Minis ek so kabine Minis. Pwazon kominal finn vinn enn
maladi byin kontazye onivo nasyonal. Pena garanti iminite okenn par. Li karyat sistem
ledikasyon ek spor. Li karyat asosyasyon sosyal ek kiltirel, dan klib. Li afekte desizyon kisannla
pu gayn admisyon, rant manb dan asosyasyon ek klib sosyal ek kiltirel.
Sinptom maladi kominal li surse dan tu kalite prezize personel ek sosyal. Latitid kominal ek so
koze kominal detestab ki al ar li, li al kont tu larezon ek fe. Alor kumsa-mem nu ariv vinn
prizonye lozik skizofrenn kot nu fer sanblan tu normal, ek sey zistifye seki pa kapav zistifye.
Prezize ki deside ki lamizik nu pa pu ekute, ki liv pa tu dimunn kapav lir, kisann-la fale pa fer
konfyans ek kisann-la fale pa marye.
Alor dan lavi tulezur, nu permet kominalism koronp nu imanite. Nu kone pwazon mem sa, me
purtan nu bwar li. Nu kondann li, apel li “demon kominal” ek nu dir bizin eliminn li. Purtan nu
transmet li zenerasyon a zenerasyon. Nu amar numem ar li.
Kumsidire nu ipnotize. Nu amar numem ar ilizyon ki sanse nu “apartenir” a enn swadizan
“kategori”. Kumadir nu pa satisfe ki nu tu sinpleman manb lespes imin. Nu komet sa grav erer
atas numem ar enn idantite ki nu liye zis ar sertin laspe spesifik vast diversite krwayans ek
pratik kiltirel, filozofik, relizye ki ekziste. Nu perdi plis ki nu gayne kan nu fer sa. Nu perdi seki
plis progresis dan sivilizasyon imin.
Nu kapav mezir sa imans lapert ek konsekans mortel ki ena ladan kan nu get orer masak dan
Rwannda, Bosni, Lenn, Alzeri, ek lezot parti lemond. Foli mertriyer dan sa bann masak-la reflet
barbari fu ki idantite kominal imaziner deklanse.
Kominalism li anpes nu truv laverite siyantifik: laverite se ki labaz nu idantite se seki nu tu
partaze an-komin. Li pa enn kestyon “toler” lezot dimunn. Veritab kestyon se pu gard numem
konsyan de seki nu ete: imin.
Perverzyon-la
But pli kle nu Konstitisyon pa fer okenn mansyon lekzistans “kominote”. Pena okenn referans a
“manb enn kominote”. Anplis, pa kategoriz nu anterm nu krwayans relizye. Nu konsidere kuma
“dimunn”, kuma “sitwayin”, kuma “elekter”. But pli inportan Konstitisyon dir nu ki nu tu
Morisyin ki ena drwa ek responsabilite egal. Nu idantite politik ek legal pa fragmante, kas-kase
an ti-morso. Nu sitwayennte li kitsoz ki antye. Li pa divize an kategori kominal.
Seksyon 31 (2) Konstitisyon dir ki nu Parlman:
“pu konstitiye de dimunn ki eli dapre Premye Sedil, ki fer provizyon pu eleksyon 70
manb.”
An-realite, kuma nu tu kone, ena zis 62 manb Parlman ki eli. Ladiferans ant sa 62 ek 70-la, li
konble par kandida bati ki nome par Komisyon Elektoral. Seksyon 31 (2) perverti laverite kan li
delibereman fer krwar ki tu le 70 Manb Lasanble Nasyonal zot eli. Kifer tu dimunn sumet a sa
mansonz-la?
Seksyon fer onte-la (Seksyon 3 (1) de Premye Sedil Konstitisyon) kumans avek ekzizans ki:
“sak kandida pu eleksyon zeneral kot elir Manb Lasanble bizin deklare dan fason ki dimann
li, dan ki kominote li apartenir ek sa kominote-la pu inskrir dan notis pibliye de so
nominasyon.”
Alor kandida oblize prezant zot mem a elektora an-term zot idantite kominal. Kikenn kapav
konteste sa idantite-la Lakur Siprem, ek desizyon Ziz, li final.
U ti pu panse ki li ti devet sifi ek ki li lozik ki kandida-la prezant li divan elektora kuma enn
imin adilt ki enn sitwayin Repiblik ek ki li plizumwin sin-despri dan sa moman kot li pe rod
reprezant enn sirkonskripsyon dan Parlman. Purtan Premye Sedil insiste ki pa kapav fer sa. Tu
kandida klasifye dan kat kategori. Seksyon 3 (4) etann orer ki ena dan Seksyon 3 (1) ki fek site,
a lepep Repiblik an-antye. Ala ki li dir lor sa size-la:
“Pu bezwin sa Sedil-la, popilasyon Moris pu konsidere kom inklir kominote Indu, kominote
mizilman, ek kominote Sino-Morisyin; dimunn ki pa paret, dapre so stil-de-vi, apartenir a
enn dan sa trwa kominote-la pu konsidere kuma apartenir a Popilasyon Zeneral. Popilasyon
Zeneral pu konsidere kuma enn katriyem kominote.”