Against communalism of the best-loser system - Lalit Mauritius

Extre depi dokiman Lalit/Lalit de Klas 1976-82
Nu finn swazir de-trwa extre kurt, kuma lexanp enn preokipasyon konstan Lalit de Klas ek Lalit
pu size kominalism.
Lalit de Klas depi 1976
Avan ki Lalit existe kuma parti politik an 1982, li ti existe kuma enn grup otur enn revi, Lalit de
Klas. Depi Revi Nimero Enn, Lalit de Klas, ti ena buku lartik kont kominalism. Par exanp, dan
Introdiksyon Nimero Enn, li dir: “Nu truve osi ki konsyans de klas proleter finn fose par serten
fakter, kuma listwar e pratik kominalism …” Dan premye lartik dan sa premye nimero la, siyne
Lolo Bibi, enn paragraf lir: “Kominalis, ki burzwazi finn servi kuma enn instriman ideolozik pu
diviz travayer, nepli ennan mem kapasite pu diviz travayer, ki dis an de sela.” Buku lartik ena
referans a kominalism, e tret kwinsidans ant klas ek kominote.
Extre kont kominalism depi De Dokiman Lalit de Klas otur fondasyon Lalit
kuma parti politik 1982
“Depi lontan Lalit de Klas pe met militan [dan MMM] an gard kont kont bann konpromi
elektoral ki gradyelman pe dezarm MMM dan lalit kont burzwazi, osi byen ki dan lalit kont
kominalism.
Zordi se lamonte kominalism ki dominn kanpayn elektoral; kifer? Purtan lalit anti-kominal ki
MMM ti amene dan lepase ti deza bare kont sa an 1976.
Nu panse ki apartir lalyans ek PSM, 2 dinamik finn devlope: premyerman, enn lalyans ki fer an
parti pu kontre propagann kominal [kont umem] ena inevitableman enn dinamik kominal par limem,
dezyeman lalyans ek PSM finn nesesit bann konsesyon o-nivo program e ideolozi (PSM
enn parti anti-kominist). Alor, dinamik kominal ki finn deklanse pa finn zwenn buku rezistans
ideolozik, mem dan parti [MMM]; rezilta se ki MMM e so bann militan zot dezarme divan
problem Lalibi, Propagann infekt lagazet The Nation e Hindu, problem kandidatir OF [grup
Sylvio Michel], lamonte PIM [enn parti kominal], etc.
Lalyans ek PSM, laranzman ek OF, bann konsiderasyon kasteis dan swazir kandida, tu sa pu
amenn bann lobi kominal e kasteis byin for dan enn guvernman MMM-PSM. Me, mem asterla,
dan kanpayn elektoral, li kler ki se presizeman par metod ki li finn servi pu sey lit kont
kominalism [atraver konpromisyon, atraver lalyans ar Harish Boodhoo] ki MMM finn uver sime
a enn komianlism virilan e mem potansyelman vyolan. Kominalism li enn mons ki bizin atake
an permanans, sinon li resorti depi dan so lakaz. Sa presizeman dan so stratezi pu gayn eleksyon
“kut-ke-kut” ki MMM finn met li-mem dan enn pozisyon kot li nepli ka-pav amenn sa lofansiz
frontal ki ti neseser pu anpes kominalism relev latet.
MMM nepli ena bann zarm ki li finn servi kont kominalis dan lepase: laliyn anti-kapitalis e
linite de klas atraver sindika for.
Se sa abandon lalti anti-kapitalis ki finn permet kominalismk dominn politik e se presizeman sa
ki [nu dan] Lalit de Klas apel enn “trahizon lalit anti-kominal”. Fevriye 1982.
Rezon kifer manb Lalit de Klas ti kit MMM le 4 Avril, 1982. Ti ena 8 rezon. Nu pe met premye
de, pu sitye linportans kestyon kominalism dan sa demisyon la.
“1. Nu krwar bizin lite pu amenn sosyalism, e ki bann klas oprime bizin evit konsansis ek
explwater.
2. Nu krwar ki dan lalit kont kominlaism e kasteism, li selman enn laliyn de klas ki pu kont-kare
kominalism e kasteism, e pa kapav ena konpromisyon.” 4 Avril, 1982.