La chambre Des Députés

fir hiren Asaz fir méi eng staark Roll vun der Fra
geéiert.
Ech hat virun zwee Joer d‘Geleeënheet, d‘Presidentin
vu Liberia, d’Ellen Johnson Sirleaf, perséinlech
kennenzeléieren a mech mat hir
iwwert d‘Situatioun an hirem Land ze ënnerhalen.
Dëst Gespréich hat mech deemools a
menger Iwwerzeegung bestäerkt, datt d‘Froe
vu Sécherheet an Entwécklung enk matenee
verknäppt sinn an datt een esou fragilë Situatiounen
am beschte mat enger regionaler Approche
begéint.
An der Stratégie sectorielle „Genre“ ënnersträiche
mer déi eminent wichteg Roll, déi de Fraen
an esou Situatiounen an am Développement
am Groussen zoukënnt. Den Zivilcourage, deen
déi dräi Laureatinne vun dësem Joer auszeechent,
selbstverständlech wéi och déi aner Laureatin,
ass natierlech zentral, wann een als Fra
an deene leschte Jore mat de Problemer vum
Liberia a vum Jemen ze kämpfen hat. De Friddensnobelcomité
huet dëst Joer mat senger
Décisioun Wäisheet a Wäitsiicht bewisen.
Här President, d‘nächst Joer, 2012, ass zu Rio
de Janeiro e wichtege Rendez-vous fir all déi,
deenen d‘nohalteg Entwécklung um Häerz läit.
Da sinn et nämlech 20 Joer hier, datt 1992 -
och zu Rio - de Weltsommet iwwert den Développement
durable ofgehale gouf, mat Verspriechen
an Orientatiounen, déi bis haut
d‘Ent wécklungspolitike ronderëm d‘Welt mat
prägen.
Zu Rio wäert d‘nächst Joer versicht ginn, pertinent
Äntwerten op déi global Erausfuerderunge
vum 21. Jorhonnert ze fannen. Mir, déi bekannterweis
d‘nohalteg Entwécklung als eng gemeinsam
global Erausfuerderung gesinn, wäerten
eis mat beschtem Wëssen, mat all eise
Moyenen an opgrond vun eisen Erfahrungen
an déi Diskussioun abréngen.
Fir d‘Lëtzebuerger Kooperatioun wor d’Joer
1992 ëmmer duebel wichteg: zéng Joer nodeems
datt mer fir d‘Éischt d‘Gesetz haten, dat
déi staatlech Entwécklungspolitik verankert
huet, an 1992 hat zu Rio den deemolege Lëtzebuerger
Statsminister Jacques Santer ugekënnegt,
datt eis Entwécklungshëllef bis d‘Joer
2000 soll op 0,7% vum RNB eropgoen. Een
Objektiv, dat jo zilstrebeg vun deenen nofolgende
Regierungen ënnert dem Premier Jean-
Claude Juncker a mat groussem Asaz vu menge
Virgängerinnen a Virgänger, Statssekretärinnen
a Statssekretär a Ministere vun der Kooperatioun
ëmgesat a souguer eropgesat gouf.
1992 wor fir d‘Lëtzebuerger Entwécklungszesummenaarbecht
net nëmme wéinst deem
quantitativen Zil wichteg, dat festgehale gouf;
1992 wor dat Joer, an deem mir Member vum
Comité d‘aide au développement, dem CAD
vun der OECD, gi sinn. Eng Memberschaft, déi
zemools duerch déi regelméisseg Exame vun
der Qualitéit vun der Lëtzebuerger Kooperatioun,
den „peer reviews“, bestëmmt gëtt.
Zënter 20 Joer steet d‘Lëtzebuerger Entwécklungszesummenaarbecht
deemno op deenen
zwee onzertrennleche Piliere vun engersäits
zouverlässeger Qualitéit (veuillez lire: Quantitéit)
an anerersäits ambitiéiser Qualitéit am
Déngscht vun der Aarmutsbekämpfung. Dat
ass eng zolidd Basis, op där mer konkret Resultater
konnte realiséieren an op där eisen éierlechen
an effikassen internationalen Effort berout,
dee mer jo och vun dobaussen unerkannt
kréien.
À propos konkret Resultater: Erlaabt mer, e puer
Resultater a Beispiller opzezielen, op déi mer an
deene leschte Jore besonnesch houfreg woren.
Et gëtt där Beispiller selbstverständlech vill, mä
vill leien der och viru menger Zäit, an dofir wëll
ech déi net opzielen, well ech mech net wëll
mat deenen anere Leit hire Méritter hei bretzen.
Ech wéilt duerno op dat eminent wichtegt
Thema vun der Politikkohärenz kommen, dann
drop agoen, wéi eis Aarbecht aus internationaler
Perspektiv gekuckt, gepréift an och ageschätzt
gëtt, ier ech d‘Situatioun an deene verschiddene
Partnerlänner kommentéieren a mat
der humanitärer Hëllef géif ofschléissen.
Här President, zu de Resultater:
Am Cap-Vert kruten 2011 573 jonk Leit
opgrond vun hirer Beruffsausbildung e Stage
an enger Entreprise. 2008 woren dat der just
57. Am Senegal goufe 642 Dierfer mat ronn
250.000 Awunner un d‘Drénkwaasser an un
d‘Ofwaasserbesäitegung ugeschloss. Zu Rundu
an zu Katima Mulilo an Namibien profitéieren
haut 86.000 Leit vun enger geregelter Planung
vun hire Wunnquartieren, an dat bedeit Zougang
zu Drénkwaasser a Kanal, mä awer och
Zougang zu de Mikrokreditter.
6
Séance 2 MeRcRedi, 12 OcTOBRe 2011
www.chd.lu
An der Hotelschoul zu Hué am Vietnam ginn all
Joer 1.000 Schüler ausgebilt, a mir wäerten
dem Grand-Duc am November bei der Statsvisite
dës Schoul gäre weisen. Am Vietnam ass
och e Bewässerungssystem agefouert ginn,
deen eng drëtt Räisrécolte méiglech mécht. Pro
Hektar ass d‘Akommes vun 300 op 1.000 Dollar
d‘Joer eropgaangen.
Am Bezierk Dosso am Niger sinn d‘Scolarisatiounstauxe
vun de Kanner am Schoulalter vu
67% op 75% eropgaangen. A wat nach méi
wichteg ass: Den Taux vun deene Kanner, déi
hir éischt sechs Schouljoren ofschléissen, ass
vun 32% op 53% geklommen.
An 13 Gemengen am El Salvador ginn haut
90% vun de Gebuerte vun Hiewannen assistéiert;
ee vun deene Sujeten, déi mer d‘nächst
Woch mam Direkter vun dem UNO-Populatiounsfong
wäerten diskutéieren, wann deen
hei zu Lëtzebuerg ass.
Am Nicaragua an am Burkina Faso gëtt et haut
keng improviséiert Blutttransfusiounen tëschent
Familljemembere méi. Virun e puer Joer huet
dës geféierlech Behandlungsmethod nach 50%
vun den Transfusiounen ausgemaach. Zënterhier
ass d‘Kollekt vu Bluttreserven am Burkina
ëm bal 100% eropgaangen an am Nicaragua
iwwer 50%.
Wéinst de Kantinsprogrammen an de Schoule
vum Burkina Faso schécken ëmmer méi Pappen
hir Meedercher an d‘Schoul. Mä d‘Josette Sheeran,
d‘Direktesch vum Welternährungsprogramm,
huet eis viru Kuerzem nach eng aner
iwweraus begréissenswäert Konsequenz vun
eisen Hëllefen op deem Gebitt beschriwwen:
Wéinst enger Extraportioun Iesswueren, déi
d‘Meedercher eng Kéier an der Woch ausgedeelt
kréien, halen hir Pappen drop, datt si ëmmer
méi laang sollen an d‘Schoul goen.
Dowéinst gi si dann och méi spéit bestuet a
kréien och méi spéit Kanner. Zum Beispill amplaz
am Alter vu 14 Joer kréie se elo d‘Kanner
mat 16 oder 17 Joer, wann hire Kierper och
ewell méi staark ass a si domadder och méi gesond
Kanner kënnen op d‘Welt setzen.
Am Kampf géint den Aids hunn haut sechs Millioune
Patienten Accès zur antiretroviraler
Behandlung, an d‘Zuel vun der Iwwerdroung
vun der Mamm op d‘Kand ass staark zréckgaangen.
Net méi spéit wéi muer wäert de
Michel Sidibé, den Direkter vun UNAIDS, hei zu
Lëtzebuerg sinn, fir iwwert d’Aids-Problematik
an der Welt ze schwätzen. Hien huet jo och eng
Entrevue mat där zoustänneger Chamberskommissioun.
Zënter datt mer am Burkina Faso hëllefen,
d‘Biodiversitéit ze schützen, konnt an engem
vun deene rare Bëscher vum Land d‘Aartevillfalt
vun 49 op 65 Zorten eropgesat ginn, an amplaz
vu 96 Beem gëtt et der haut 490 pro Hektar.
Global Partnerschafte fir d‘Ëmsetzung vun de
Millenniumsziler huet Lëtzebuerg virun allem
doduerch ënnerstëtzt, datt mer déi Éischt
woren, déi am Juni vun dësem Joer véier Haaptpartner
vun de Multilateralen - den UNO-Entwécklungsfong,
den UNO-Populatiounsfong,
d‘Unicef an den UNO-Fong fir lokal Entwécklung
a Mikrofinanz - dozou bruecht hunn,
een an deeselwechten Accord-cadre mat eis ze
ënnerschreiwen, am Sënn vun der Harmoniséierung
vun de Prozeduren a fir et eise Partnerlänner
am Süde méi einfach ze maachen,
mat deene sëllechen Entwécklungsacteuren
eens ze ginn. Vill vun eise Partnerlänner sinn
elo grad genannt ginn.
Natierlech sinn d‘Resultater, déi ech opgezielt
hunn, nëmmen an Zesummenaarbecht mat
den nationalen Autoritéite méiglech ginn. An
deem Kontext géif ech och gären d‘Ambassadeuren
aus eise Partnerlänner begréissen, déi
de Wee op Lëtzebuerg fonnt hunn, fir duerch
hir Präsenz de Mëtteg an der Chamber de
Geescht vun dem Partenariat ze bezeien, an
deem mer zënter Jore matenee schaffen.
Déi meescht vun de Resultater kommen
opgrond vu Projeten zustanen, déi mer mat
eiser nationaler Agence Lux-Development ëmsetzen.
Vun dëser Plaz aus géif ech wëllen e
grousse Merci soen dem Generaldirekter
Gaston Schwartz a senger Équipe, mä och de
Membere vun dem Verwaltungsrot, fir hiren
Asaz a fir hire Professionalismus. D’Aktivitéite
vu Lux-Development ginn iwwregens an dësem
Moment engem Audit vun der Cour des
Comptes ënnerzunn. De Ministère steet der
Agence a selbstverständlech de Contrôleuren
zur Säit.
Et ass deem engen oder deem anere vun Iech
sécher net entgaangen, datt d’Lëscht vun
deene konkrete Resultater net zoufälleg esou
opgestallt gouf. All dës Resultater entspriechen
nämlech op d’mannst engem vun deenen
aacht Millenniumsentwécklungsziler, wéi se am
Joer 2000 vun de Stats- a Regierungschefe bei
der UNO ugeholl goufen. Mir wëssen haut,
datt mer dës Ziler leider net alleguerten an net
iwwerall bis 2015 wäerte kënnen ëmsetzen.
Dräi Joer virum Stéchdatum schéngt et mer
duerfir ëmsou méi wichteg, preuve à l’appui,
net nëmme kënnen nozeweisen, datt eppes geschitt,
mä och, wat geschitt a wat funktionéiert.
Opgrond vun de positive Resultater wéi dëse
muss et méiglech sinn, an deenen nächste
Joren d’Ëmsetzung vun de Millenniumsziler méi
séier ëmzesetzen an deenen Honnertdausenden,
déi haut nach ausgeschloss sinn, esou
séier wéi méiglech ze hëllefen.
Här President, et wor mer wichteg, dësen
Échantillon vu konkrete Resultater kënne virzedroen.
Ech ginn nämlech dovun aus, datt
d’Chamber, mä och all Lëtzebuerger an all Leit,
déi hei wunnen, am grousse Ganzen e Recht
drop hunn, net nëmmen ze wëssen, wat mat
de Lëtzebuerger Entwécklungsgelder geschitt -
duerfir maache mir jo de Rapport annuel -, mä
si hunn och d‘Recht ze gesinn, wat effektiv
duerch eis Aktioune bewierkt gëtt a wat derbäi
als nohalteg Entwécklung erauskënnt.
Et ass och esou, wéi ech den Ënnerscheed verstinn,
deen haut an der internationaler Diskussioun
tëschent Efficacité de l’aide an Efficacité
du développement gemaach gëtt. Duerfir
wäerte mir an Zukunft, am Kader vun eiser
Kom munikatiounsstrategie, méi dacks a méi
de tailléiert Resultater vun der Lëtzebuerger
Koo peratioun virstellen.
D’Resultater vun den Evaluatiounen, déi mer
regelméisseg vun den Aktivitéite mat eise
Partner - der Lux-Development, den ONGen an
den internationalen Organisatiounen - an Optrag
ginn, wäerten an Zukunft verstäerkt ausgetosch
ginn. D’Entwécklungszesummenaarbecht
ass keng exakt Wëssenschaft, an och dee
beschte Projet kann nach verbessert ginn an
och nach ausgebaut ginn.
D’Recommandatioune vun den Evaluatioune
weisen eis engersäits, wou et néideg ass nozebesseren,
an anerersäits, wat sech als gutt
Praxis erwisen huet an derwäert ass, widderholl
ze ginn. Am Kontext vun enger Evaluatiounsstrategie
sollen dës Erfahrungswäerter kënnen
erfaasst ginn an als Orientatioun an d‘Gestaltung
vun eiser Kooperatiounspolitik afléissen.
Mir wëssen, datt am Développement d’Suen
eleng net duerginn. D’Qualitéit an d’Éierlechkeet
am gemeinsamen Effort sinn onëmgänglech,
fir nohalteg déi Changementer an enger
Gesellschaft ervirzebréngen, déi der grousser
Zuel vu vernoléissegte Fraen, Männer a Kanner,
déi wéinst der Aarmut um Rand vun der Gesellschaft
liewen, Zougang zu deenen elementaarste
Rechter a soziale Servicer ginn. Den
Invest an déi mënschlech an déi institutionell
Capacitéite vun eise Partnerlänner ass op
d’mannst esou wichteg wéi den Invest an Infrastrukturen
an an technesch Équipementer.
Dës Suerg ëm de Renforcement des capacités
hu mir kierzlech, no engem Échange mat Lux-
Development a mam Cercle des ONG, och a
Form vun enger Stratégie sectorielle zu Pabeier
bruecht. D’Beispiller, déi ech opgezielt hunn,
illustréieren, datt nohalteg Resultater méiglech
sinn, wann de politesche Wëllen, dat finanziellt
a mënschlecht Kapital an déi néideg technesch
Mëttele gebündelt dozou agesat ginn, fir positiv
Changementer erbäizeféieren.
Dat verlaangt ee laangwieregen Asaz an eng
permanent Bereetschaft, d’Hänn net an de
Schouss ze leeën, och wann d’Resultater sech
net ëmmer esou séier astellen, wéi ee sech dat
géif wënschen, a wann et Réckschléi gëtt, zum
Beispill wéinst engem Coup d’État oder enger
Weltwirtschaftskris oder heiansdo aus vill méi
banale Grënn.
D’Lëtzebuerger Entwécklungs-ONGen, déi Dag
fir Dag mat hire lokale Partnerorganisatiounen
um Terrain schaffen, wësse vu wat ech schwätzen.
An erlaabt mer op dëser Plaz, hiren Asaz,
dee jo zum Deel méi laang dauert wéi dee vun
der öffentlecher Säit, ze wierdegen an hinnen e
grousse Merci ze soe fir déi konstruktiv Zesummenaarbecht
mam Ministère, am Interessi
vun deenen äermste Populatioune ronderëm
d’Welt.
Ech géif wëlle stellvertriedend fir si alleguerten
hei den Här Jos Hilger ervirhiewen, deen no 45
Joer aktiver Aarbecht an Asaz fir d‘Fondatioun
Raoul Follereau dëst Joer a senger Organisatioun
de Presidenteposten ofginn huet.
w Mme Anne Brasseur (DP).- Très bien!
w Mme Marie-Josée Jacobs, Ministre de la
Coopération et de l‘Action humanitaire.- Mir wëssen
d‘Begeeschterung vun den ONGe fir
d’Saach ze schätzen, grad wéi hir Roll als proaktiven
Deel vun enger engagéierter Zivilgesellschaft,
déi legitimerweis hire Suergen, Iwwerleeungen,
Propositiounen a Fuerderungen Ausdrock
muss kënne ginn. Den Dialog mam Ministère
leeft zënter Joren iwwer flexibel strukturéiert
Weeër, sief et am regelméissegen Aarbechtsgrupp
mam Cercle des ONG, am direkte
Gespréich mat de Mataarbechter aus dem Ministère
oder, wéi kierzlech erëm, während den
Assisen.
Mir deelen d’Suerg vun den ONGen ëm d’Nohaltegkeet
vum internationalen an och vum
nationalen Effort an der Entwécklungszesummenaarbecht,
ouni déi d’Fortschrëtter bis haut
an d’Perspektive fir muer riskéieren ze verdämpen.
Mir deelen och d’Suerg vun den ONGen ëm
d’Effikassitéit vun der Hëllef an ëm d’Kohärenz
vun de Politiken, déi Effikassitéit vum Développement
soll mat vergréisseren. Als Regierung
kënne mer eis natierlech net erlaben, mat öffentleche
Gelder kontraproduktiv Politiken ze
maachen. D’Gréisst an d’Organisatioun vum
Regierungsverwaltungsapparat grad wéi vun
eisem öffentleche Liewen am grousse Ganzen
erlaabt eis nach ëmmer ze wëssen, datt déi
lénks Hand weess, wat déi riets Hand mécht.
D‘Kohärenz vu Politike kann een deemno zu
Lëtzebuerg gutt organiséieren; et kann ee se
allerdéngs net dekretéieren!
Fir d’Diskussioun ëm d’Kohärenz vun de Politike
fir den Développement ze féieren, hu mer
de Comité interministériel, deen, wéi d’Gesetz
et virgesäit, vun der Regierung agesat gouf an
deen den Optrag huet, zu alle Froe ronderëm
d’Kooperatioun, also och zur Kohärenz vun de
Politike fir d’Entwécklung, Stellung ze huelen
an der Regierung Avisen ze maachen.
Zënter engem gudde Joer huet dëse Comité
regelméisseg en Austausch mat den ONGen,
an den Direkter vun der Kooperatioun, als
President vum Comité interministériel, suergt
fir dee konkrete Suivi an engem Fall vu Politikinkohärenz,
deen der Entwécklung am Süde
kéint schueden. De Comité hëlt awer keng Décisiounen.
All Comité ass e konsultativt Organ a
kann also keng Décisioun huelen. Seng
Compte-renduë kréien ech, oder Dir fannt se
awer selbstverständlech um Internet. Wann et
néideg ass a méi wéi ee Minister betraff ass, gesinn
ech mech an der Flicht, de Sujet um adequaten
Niveau opzewerfen, zum Beispill am
Regierungsrot.
Hei e Beispill, fir ze illustréieren, wéi dat an der
Praxis ka goen: Viru genee véier Méint, den 12.
Juli, hunn d’ONGen, am Gespréich mam Comité
interministériel, bedauert, datt Indien an
de Verhandlunge mat der Europäescher Kommissioun
ëm en Accord de libre échange bis elo
refuséiert huet, eng Klausel iwwert den Développement
durable mat anzebauen. Ee Fall vu
Politikinkohärenz, deen effektiv d’Suerg ëm
d’nohalteg Entwécklung an Indien kéint verwässeren.
Deemno d’Fro vun den ONGen un
d’Regierung, zu Bréissel ze intervenéieren, fir
hirer Revendicatioun, déi eis absolut legitim
schéngt, Nodrock ze ginn.
Net méi spéit wéi de 26. September huet beim
Ministeschconseil iwwert den Aussenhandel de
Lëtzebuerger Vertrieder, zesumme mat de Vertrieder
vun Dänemark an Holland, dëse Punkt
nach eng Kéier opgeworf, wourop den zoustännege
Kommissär Karel De Gucht sech
enga géiert huet, dës Fro erëm mat den indeschen
Autoritéiten opzewerfen an drop ze insistéieren,
wéi wichteg ee Verweis op nohalteg
Entwécklung der Europäescher Unioun an
engem internationale Vertrag iwwer Aussenhandel
ass.
Deemno ass et haut net nëmme virgesinn, datt
hei zu Lëtzebuerg d’Ministèren an d’Verwaltunge
grad wéi och d’Zivilgesellschaft Froen
zur vermeintlecher Politikinkohärenz am Kontext
Développement kënnen an engem zoustännege
Gremium opwerfen, mä et besteet
och, wéi d’Beispill et weist, eng effikass Prozedur,
fir Fäll vu konkreter Inkohärenz ze behandelen
an ze tranchéieren.
Et ass mir als Kooperatiounsministesch ëmsou
méi wichteg, dat behaapten ze kënnen, well de
Comité d’aide au développement vun der
OECD eis 2008 ugeroden hat, eis ëm eng effikass
Manéier ze beméien, fir d’Kohärenz vun de
Politike fir den Développement ze garan téieren.
En anert Beispill, bei deem d’Kohärenz vun de
Lëtzebuerger Politiken a Fro gestallt gëtt, well
negativ Auswierkungen op den Développement
vun den Entwécklungslänner ze fäerte sinn, ass
de Kampf géint de Klimawandel. An do kréien
ech heiansdo ënnerstallt, ech géif näischt verstoen,
an d’Kooperatiounspolitik géif no de
Prioritéite vun anere Politikberäicher gestalt
ginn. Dat stëmmt selbstverständlech net!
Mä de Minister fir nohalteg Entwécklung géréiert
de Kyoto-Fong, an net de Kooperatiounsminister;
gradesou wéi den Aussenhandelsminister
d’Lëtzebuerger Wirtschaft am Ausland
promouvéiert, an net de Kooperatiounsminister.
Den Immigratiounsminister an de Familljeminister
këmmere sech zu Lëtzebuerg ëm
d’Flüchtlingen, an och net de Kooperatiounsminister
- wann dat och zoufälleg op enger vun
deenen zwou Plazen deeselwechten dës Kéier
ass.