Mise en page 1

Maria, a mamma, hà bisognu di parlà. U zitellu, dipoi
marti scorsu (u ghjornu di a lettara) l’hà vista rinvivisce.
Ella chì, da guasi un mese in quà, si piattava per
pienghje, avà cantichjuleghja appruntendu u manghjà,
fendu a bugata* o stirendu i panni. Ben ch’ella sia
incinta di cinque mesi, cù u so corpu chì principia à
spuntà, macaru cù a fatica di u travagliu ch’ella face da
a mane à a sera, Maria ùn si lagna mai.
Petrantone ùn risponde. Ellu stà à sente i centu rimori
di a notte. Ciò chì li piace u più hè u stridu, acutu
cum’è un fiscu, di i grilli chì facenu u so chjama è
rispondi. L’aria hè dolce è umida, si sente un adore di
menta, di calaticcia è di fenu.
U sumirellu grisgiu, chì trascina a carretta, pare
cuntentu anch’ellu. U zitellu u incuragisce ogni tantu :
« Zè, o Passiminù, Zè ! », è face chjuccà u so staffile.
Siguitendu u passu di a fera ind’è a luce di a lanterna,
pensa Petrantone à unipochi di filari d’una puesia in
francese :
« Sur le chemin du bord du fleuve lentement
Un ours un singe un chien menés par des tziganes
Suivaient une roulotte traînée par un âne
Tandis que s’éloignaient dans les vignes rhénanes
Sur un fifre lointain un air de régiment ».
Stu puema, ùn l’hà amparatu à a scola : cù u maestru,
riciteghja solu puesie di Victor Hugo, di La Fontaine, o
di un certu Déroulède. Innò, quessa hè
Ghjacumusantu, u babbu, chì a l’hà fatta leghje ind’un
carnettu ch’ellu tene sempre ind’istacca. Si n’arricorda
sempre u zitellu di ciò ch’ellu li avia cuntatu, una sera
à cena, dui anni fà :
- À u fronte, à partesi da novembre 15, aghju
14