Mise en page 1

- Mi ne vocu à spassighjà… Forse andaraghju sin’à…
U vechju ùn lu stà à sente. Una carezza in li capelli, po
ripiglia :
- Sì bellu tristu, u mo zitellu… Ùn ci vole à statti
solu, cusì ! Pinsatu aghju una cosa : perchè chì ùn
vinaristi cù mè è cù Dumenicu, compia ch’ella sarà a
fiera di Lisula, à a Santa di u Niolu ? Cascette di scarpi,
n’avemu sei per omu da vende. Ci vularia à calchissia
per aiutacci… Chì ne dici ?
U zitellu ùn sà ciò ch’ellu hà da risponde.
- Ne possu parlà à Maria, s’è tù voli, dice u vechju.
- In Niolu… Hè luntanu u Niolu, o Ziu A’ !
- Dui ghjorni di capriulè… Hè un bellu viaghju, mì !
È à tè, o Petrantò, ti farebbe prò… Ci vole à parte a
mane à bon’ora. A sera, à l’attrachju, simu in Vulparone,
l’ustaria di l’Acani, daretu à San Culumbanu. Quallà si
manghja è si dorme è u lindumane, à tempu à ghjornu,
ripartimu. Francatu a Scala di Santa Regina, si
ghjunghje in Niolu toccu a notte… Allora rifletti…
Mi ci vole una risposta per luni. S’è tù sì d’accunsentu,
eiu m’occupu di dumandà à mammata.
Partutu ch’ellu hè u vechju, u zitellu pensa à a so
pruposta. Cullà à a Santa, ellu ne sunnieghja di poi
ch’ellu hè chjucu chjucu… Cuntava di falla cù u babbu
chì a li avia prumessa. Ma avà ! Hè vera chì ziu
Anghjulu hè bravu. Cun ellu, Petrantone si sente in
securità… È cusì, forse pinsarà menu à a morte di u
babbu, à i pienti di a mamma…
Avà, hè ghjuntu sottu à I Pinzoli, accantu à u
pagliaghju. In fondu à a valle, quaiò à Lisula, sente i
rimori di quelli chì approntanu i barracconi pè a fiera :
martillate pè inchjudà e tavule, legne strascinate…
54