Mise en page 1

quella sera. Babbu è Mamma m’avianu chjosu in
camara cù Fiffina, a mo surillona, è cù u mo
fratillucciu. Ùn pudiamu vede nulla, chì era notte
ceca, ma pudiamu sente ! Mì, nulla cà di dilla,
m’arrizzanu i capelli in capu… Pè a finestra aparta -
eramu d’estate - avemu intesu un lagnu, cum’è un
mughju longu… È issu mughju, à pocu à pocu, hè
divintatu un cantu, ma un cantu sinistru, un cantu di
morte, chì arricava a paura. Fiffina, a mo surella,
m’avia dettu, stringhjendumi pè u bracciu : « Senti, o
Bastià : què hè un lamentu ».
Bastianu hà finitu di parlà. Tutti i zitelli si stanu zitti,
cummossi da e parolle di u cumpagnu.
Tandu, una vuciata d’omi si face sente, quallà versu a
murilletta*. Petrantone ricunnosce a voce di Petru, u
ziu, è quella di Ceccè, u so amicu chì, cum’è sempre,
si cuntrastanu.
- È eiu ti dicu chì i suldati alimani ùn ci sò per nulla :
elli ubbidiscenu. Sò i capimachja i rispunsevuli. È u
primu hè Guglielmacciu, u so imperatore…
- Iè, ma sò i bosci - i suldati vogliu dì - chì ci
firiscenu è chì ci tombanu…
- Ma chì ne sai tù, chì in guerra ùn ci sì andatu !
- Ancu di grazia chì ùn l’aghju fatta ! Cù nove figlioli
da mantene, mi pare ghjustu l’affare, nò ?
- Ùn dicu u cuntrariu, ma sappia una cosa : eiu ci era
à u fronte, sin’à marzu 15, quand’e sò statu firitu è
ch’aghju persu un bracciu… È ti possu di chì, pè
Natale 14, cù l’alimani, trà mezu à e duie transciè,
avemu fraternizatu. Inseme, avemu manghjatu è betu,
è ancu ghjucatu à carte ! Ebbeh, sai ciò ch’elli dicianu ?
Dicianu chì elli, vulianu rientre in casa soia. Ci n’era
27