Mise en page 1

Issu cugnome, Lumacone, Martinu ùn lu pò suppurtà.
Sà chì ognunu u chjama cusì, ma mai in la so prisenza.
Torna rossu rossu u zitellu. Di stizza ghjetta e so piastre
è, à pugni stretti, corre appressu à u cumpagnu chì l’hà
offesu… Avà, anu da falà i colpi ! Ma tutti l’altri si
mettenu à mezu per appacià. À chì para à Martinu, à
chì tene à Bernardu… À u capu d’un minutu torna u
calmu. E femine chì ghjucavanu à pampana ind’un
scornu di a piazza sò vinute anch’elle à acchità à
Martinu.
Camilla, a surilluccia, li parla pianu pianu.
- Ùn ti ne fà… Ùn diciaraghju nulla à Mamma. Ma
o Martì, perchè chì ti metti sempre in zerga ?
Nant’à a murilletta di piazza, uni pochi di masci anu
fattu pusà à Bernardu. Pasquale, u so amicu, u
ragiuneghja :
- Hè dipoi annu, d’aprile, quand’ellu hè mortu
Simone u babbu à u « Chemin des Dames » ch’ellu ùn
hè più listessu Martinu : ùn li si pò dì nulla, hè sempre
azezu, ùn ride più... O Bernà, ci vole à scusallu, mì !
- A capiscu, o Pasquà, ma hè statu ellu chì m’hè
vinutu addossu… ai vistu !
Tandu, Martinu chì s’hè calmatu, s’avvicina è porghje a
manu. I dui zitelli s’abbraccianu. Avà, sò torna amichi...
- S’ellu ci era statu Petrantone… Tandu sì chì
avarebbemu vintu in quattr’è quattr’ottu, dice
Ghjaseppu.
Tutti sò d’accunsentu, puru l’avversarii. Cì vole à dì chì
Petrantone hè un ghjucadore trimendu, è micca solu à
piastra : ellu sà ghjucà à u soldu, à ciccia, à i cavallacci,
à a carrega d’oru…
8