Mise en page 1

Ajoutent leur clarté soudaine
A tes beaux yeux O Madeleine… »
- Ah ! Què, l’hà fatta quand’ellu ci era Babbu : ci hè
scrittu « Février 1916 ».
Ma cala a luce, è u zitellu ùn riesce più à leghje. È po,
di sottu, li si pare di sente a voce di Antunietta, a
surilluccia, chì chjama à Ficcanasu. Prestu ripone i
carnetti ind’è a cummoda, chjode i scagni, è rifala à u
piantarrenu à accoglie a mamma è e surelle…
- O Petrantò ! O Petrantò ! Aiò, veni ! U zitellu
s’affacca à a finestra. Bastianu, Martinu, Ghjaseppu è
Alivu sò sottu à a fica, in piazzetta.
- Chì vulete ?
- Voli vene cù noi à u fiume ?
- Induve ? Quaiò ver di e vigne ?
- Innò, sopra : ind’è e Chjarine, daretu à Torru. Avemu
da fà una storta. Hè faciule, mì : basta à tappà cù duie
petre è appena di tarra trà mezu à dui radiconi. Tandu
l’acqua si scorre per un antru camminu. Dopu, ùn ci hè
più cà da biutà i pozzi cù i stagnoni, è da piglià l’anguille.
- È quantu site ?
- Noi quattru, u Babbone di Bastianu, u to ziu Petru
è u so amicu Ceccè. Tandu, Ghjaseppu caccia da u
stagnone un arnese* di farru luccichente chì
s’assumiglia appena à e furbice per tonde e pecure. Ma
invece d’esse taglive, isse trisore tamante anu e so
lastre assistate di denti pinzivi.
- Mì, mì o Petrantò : sò nove nove ! L’hà fatte eri
Simone ind’è a so stazzona. Cù què, anguille ùn si ne
perde manc’una… È sai, ci n’hè torna quattru paghje !
- È po vidarei : sò sicuru ch’elle ci anu da esse ancu e
truite…
40