Mise en page 1

À partesi da custì, nascì u scinariu : Petrantone un zitellu di u
paese… u babbu suldatu à u fronte… hà da ghjunghje in
permissione… e ghjente accolte nant’è u portu di L’Isula... u
battellu affundatu chì ùn ghjunghjarà mai… u dolu di tutta una
cumunità…
Da assistà a criazione, almanaccò u maestru un prugettu
pedagogicu di prima trinca, tucchendu ogni disciplina è
inghjinnendu miraculi di ricerche ind’è i varii duminii di
l’attività.
Custì s’impignonu maestru è sculari ind’è a scrittura di u soiu u
rumanzu. Ma ùn bastava solu à cuntà una storia. Ci vulia à dì a
vita di a Corsica di tandu, u tempu di a guerra è di l’attesa, i
mistieri è i ghjochi zitillini di tandu, e faccende campagnole è e
nutizie di u fronte…
È viaghjò a criazione… È s’animò a cumunità santariparataccia
d’una volta, a so vita cutidiana à mezu à i paisaghji di Balagna…
cù tanti persunagi d’ind’è noi, ma dinò - andate po à capisce !
- un certu Apollinaire… ghjuntu di manera indiretta ind’è u
racontu zitillinu… è a fine inaspittata… È po stu titulu
misteriosu : « U Cinquantottesimu ».
Ma piantemu quì… Acqua in bocca ! Ùn palisemu po !
Lascemuci purtà da a criazione zitillesca è vultemu in l’annu
Diciottu, tempu di u Macellu maladettu è di u dispacciu
tradimintosu, ma tempu dinò di a pace ritruvata è di a speranza
chì rinasce, incù una prichera sola :
« A tinuta di pannu turchinu
Fà ch’ella ùn si veca mai più. »
MICHELE FRASSATI
Ispittore di l’Educazione Naziunale
Incaricatu di a Missione Accademica L.C.C.