Mise en page 1

À tavula, Petrantone ùn capisce perchè Maria hè
ammusciata è ùn apre a bocca. Mostra a so Cursichella
à Luisa, à Ghjacumina è à Antunietta, e surelle. Si
stona dinò di vede l’ochji di e trè femine chì s’empienu
di lacrime.
- Ùn vi face piacè ch’è l’appia ritrova ?
(un silenziu)… Po risponde a mamma :
- O u mo figliolu, ùn hè quessa… S’è tù sì cuntentu
tù, eiu sò cuntenta per tè. Babbitu a t’avia rigalata à tè,
allora tenila puru… Ma ricordati : ci avia da purtà
furtuna, è invece… è invece…
È Maria, anch’ella, si mette à pienghje.
Capisce allora Petrantone chì u fattu d’avè ritrovu u
ghjuvellu è di fallu vede hà apartu firite chì
principiavanu à chjodesi. Allora, à pocu à pocu, a so
gioia si ne và. O cusì trista a fine di a cullaziò !
Avà, hè solu u zitellu. Ficcanasu ùn ci hè. I cumpagni
sò falati à Lisula à vede appruntà u campu di fiera : à
pedi, ùn ci vole manc’un’ ora pigliendu l’accurtatoghji.
Ma ellu ùn ci hè vulsutu andà. Di poi ch’ellu hà vistu
pienghje à Maria è à e femine, hè cuntrariatu è ùn sà
più cosa pinsà : ora hè cuntentu d’avè torna a so
Cursichella (a sola cosa chì li ferma di u babbu) ora hè
stizzosu ch’ella l’appia traditu… Persu in li so pinseri,
s’avvia pianu pianu versu E Ramice, pigliendu torna,
cum’è sta mane, a strada di Munticellu.
- O Petrantò, mi pari bellu pinserosu ! Induve a
pigli ?
U zitellu trasalta. Hè ziu Anghjulu, u fratellu di u
babbone. Ellu hè scarparu, è amicu cù ziu Dumè,
quellu di a baretta di marina. Rientre da l’ortu cù un
saccu à l'armone.
53