La strada del formaggio - Gustolocale

Carnevale
34
Ze ciara l'aria,
rasserenà,
e mi sul tàcito
balcon sentà
vardo le màscare
che sul viale
bala cantando
al carnevale.
Ciamo na màscara
inboressà.
"Ciò, mascareta,
come la va?"
"La festa infuria,
el vin no 'l manca,
balo e me àgito
a drita e a sanca.
A go coriàndoli,
stele filanti,
voja de vìvare
par tuti quanti,
se ghe ze grùstoli
e bussolai
qua l'alegressa
no manca mai.
A magno frìtole
in abondansa
fin a ris-ciare
el mal de pansa;
ma un bon giosseto
de vin novelo
fa desgropare
ogni buelo.
Balo e desméntego,
mi mascareta,
che la quarésema
vien vanti in freta.
Anca ti, dài,
vien zo a balare,
la to quarésema
la pol spetare".
Cusì la màscara
con alegria
la fa l'inchin
e la va via.
E mi sul tàcito
balcon sentà
resto pa un àtimo
inpapinà.
Ma vuto propio,
santa passiensa,
che sia za ora
de penitensa?
E che par mi
sia za finia
l'ora gioiosa
del'alegria?
A vo de corsa
zo par le scale,
vojo cantare
al carnevale;
la festa infuria
el vin no 'l manca,
balo e me àgito
a drita e a sanca.
Capisso alora
che me incantésema
pi el carnevale
che la quarésema,
a me desméntego
de la me età,
rido e sganasso
come un danà.
Eviva i grùstoli
e i bussolai:
ch'el carnevale
no more mai;
viva le frìtole
d'istà e d'inverno:
ch'el carnevale
dure in eterno.
Balo coi tosi
alsando al celo
el me bicere
de vin novelo,
e po me giro
con derision
verso el me tàcito
scuro balcon.
Alora el tàcito
ride e el me frusta:
"Ciò, mascareta,
cóntala giusta!"
Ma 'l balo infuria,
el vin no 'l manca,
e mi me àgito
a drita e a sanca.
Giorgio Zambon
de "La Panocia"
di Schio