Superspar Springbok - Nuwe dimensies

Geestelike voedsel
Oordenking
Dr.Kobus Victor
KERSFEES
Die woordjie Kers in Kersfees het niks te doen met die vetstafie met 'n pit in
wat ons voorouers as ligbron gebruik het nie en wat ons deesdae soms
noodgedwonge moet gebruik as die krag afgaan nie. Dit is 'n Oud-
Nederlandse woord wat ons ook vind in die Afrikaanse woord kersten: om
iemand tot die Christelike geloof te bring, of om iemand 'n Christen te maak.
Dus: Kersfees beteken letterlik Christusfees.
Ek merk dat al hoe meer besighede in ons tyd nie meer van Kersfees praat
nie, maar van Feestyd. Sonder die Kers as voorvoegsel. Die Fees word dus
van sy Kers ontneem, inderwaarheid word dit ontchristelik. Ek vermoed hulle
doen dit om polities korrek te wees. En daarteen kom ek werklik in opstand.
Die ander groot godsdienste in ons land is onbeskaamd Islam, Hindies, Jood
of wat ookal. Maar ons laat dit maar toe, dat ons Christelike feesdag
afgewater word tot 'n festive season. Wat my die onrustigste maak, is dat
wanneer 'n mens 'n standpunt inneem en teen hierdie soort optrede kapsie
maak, jy soms deur jou mede-Christene as 'n fundamentalis uitgekryt word, 'n
verkrampte en oud-modiese Christen wat iewers tred verloor het en totaal
agter die tyd is. Laat dit dan maar so wees, maar ek gaan my nie daardeur
laat ontmoedig om vir my Christelike geloofsoortuigings uit te kom nie.
Aan al die lesers van Kletz wat soos ek voel, wil ek 'n geseënde Kersfees
toebid. Kom ons sit ook met ons Christelike manier van lewe die Kers
(Christus) weer terug in Kersfees.
Mag dit vir julle almal 'n wonderlike Christusfees wees!
Soek en jy sal God vind
Lukas 2:7
―Sy het haar Eerstelingseun… in ‘n krip neergelê, omdat daar vir hulle geen
plek in die herberg was nie‖.Die eerste Kersfees het waarskynlik in ‘n
caravanseria afgespeel. Van hierdie herberge was daar in die antieke tyd baie
– buite die dorpe of langs die hoofweë. Vertrekke is gebou rondom ‘n
binneplein waar die pakdiere of vee vasgemaak kon word vir die nag. Moeë
reisigers kon in ‘n leë vertrek afpak en rus. Met die massas mense in
Betlehem was die kamers egter tot oorlopens toe vol. Maria, reeds in pyn, het
waarskynlik beangs gewonder waar sy en Josef plek sou kry vir die geboorte.
Uiteindelik moes hulle hul maar tuismaak net daar waar hul donkie
vasgemaak was. So word Hy in die vuil en gedrang gebore, die Kind van
doodgewone en onbelangrike ouers. Hoe anders as die hoë verwagtinge wat
die mense van hulle Messias gekoester het – ‘n Koningskind, ‘n
gerespekteerde Leier. Baie min sou die Messias dáár gaan soek! En so is dit
met Kersfees vandag. Die liggies flikker, die Kersklingels speel, die persente
hoop op onder die boom en Kersvader lag ho-ho-ho. Die versierings is pragtig
en die glansbrosjures preek ‘n seisoen van vrede en welwillendheid. Maar al
is daar is ‘n figuurtjie in die Kersstelletjie se krip, is die fees onbeskaamd
Christusloos.Hoe harder die musiek en hoe leër die glase, hoe duideliker word
dit: Iets is weg. Maar weet jy, as jy regtig soek, sal jy Hom iewers in die
gemaal kry – op ‘n onwaarskynlike plek, by doodgewone mense. Miskien in
iemand se oë… Wees op die uitkyk. -Jimi le Roux (Leef)
Church Sign
Die 10 Gebooie word 10 beloftes
1. As Ek die belangrikste in jou lewe is, sal jy geen ander gode
wil dien nie, omdat jy My sal ken en weet dat Ek die enigste
ware en lewende God is - ek sal die ereplek in jou lewe hê.
2. As Ek in jou hart is, sal dit nie nodig wees om gesnede
beelde van my te maak nie, want jy sal self My beeld wees.
3. As jy My liefhet, sal My naam nooit 'n vloekwoord oor jou
lippe kan wees nie, maar in alle omstandighede deur jou geëer
en gerespekteer word.
4. As Ek die ereplek in jou lewe het, sal die Sondag die
hoogtepunt van die week vir jou wees. Dit sal vir jou 'n vreugde
wees om in die gemeenskap van die heiliges My te aanbid. 'n
Dag nie om na op te sien nie, maar om na uit se sien.
5. As Ek in jou lewe is, sal dit vir jou 'n voorreg wees om jou
ouers te eer en lief te hê. Dit sal nie vir jou moeilik wees nie,
want agter hulle, sal jy My sien wat hulle vir jou uitgekies het.
6. As jy in My liefde leef, sal jy nooit iemand wil seer maak nie,
om iemand dood te maak sal nie eers in jou gedagtes opkom
nie.
7. As jy My liefhet, sal dit nie moeilik wees om aan jou
lewensmaat getrou te wees nie. As Ek 'n plek in julle huwelik
het, sal julle vir mekaar lief wees, want julle liefde vir mekaar, is
'n beeld van My liefde vir julle.
8. As Ek op die troon van jou lewe sit, sal jy daagliks vra: Aan
wie en waar kan ek aan 'n ander iets gee of goed doen en sal jy
nie iets van 'n ander wil neem nie.
9. As Ek in jou lewe is, sal dit nie meer vir jou lekker wees om
van 'n ander kwaad te praat nie. Deur My Gees sal jy 'n mens
wees wat van 'n ander niks sal sê as dit nie iets goeds is nie.
10. As jy een is met My, sal My Gees jou tevredenheid gee om
vergenoegd te wees met wat jy het, met die besef dat Ek gee
soos wat jy dit nodig het. Wat Ek gee, is altyd genoeg en niks
sal jou ontbreek nie - jou beker loop oor.
KERSFEES - Hier? Vir my?
Ja ,jy hoor en lees dit in die media, beleef dit in die
samelewing, ervaar dit soms aan jou eie lyf: die lewe kan nogal
regtig ‗n slagveld wees. So tussen die tekens van stukkende
verhoudings, teleurstellings, siekte en dood, seergemaakte
lewens… skreeu jy mos in jou hart partykeer: Sal dit dan nooit
ophou nie? Hoelank kan ek steeds vertrou en mag ek aanhou
hoop? Is daar en wanneer sal daar antwoorde wees op my
baie vrae?
Is daar hoop? Ja daar is! Deur al die tye het mense se
hulpkrete God se oor bereik; het die stukkend-gebreekte
skepping Sy hart aangeraak. Daarom het God, in die volheid
van die tyd, die sluise van Sy genade oopgetrek. Op ‗n skoon
nag, bietjie meer as 2000 jaar gelede, is HY gebore. Sy
Naam? Jesus Christus. Hy het God se genadepad aarde toe
kom bou. Met liefde. Tot vlak by ons nood, op die voorstoep
van ons kwelvrae, in die binnekamer van ons hartseer…
God se genade het ‗n Naam en Adres gekry daardie nag in
Betlehem in Judea en vandag in Namakwaland in die Noord-
Kaap. Want Jesus Christus is gister en vandag dieselfde, tot in
ewigheid. En toe Hy uiteindelik die hartseerste waarom-vraag
gevra het - O God, waarom het U My verlaat? - is die
duidelikste DAAROM op al ons waarom-vrae gegee: Daarom
is daar nou vrede tussen ons en God deur ons Here Jesus
Christus (Rom.5:1), en kan niks, maar niks ons ooit van die
liefde van God skei nie… (Rom.8:38,39).
Dis die wonder van Kersfees - hier, vir jou en my: Nie ‗n mooi
wense van maanskyn en rose nie, maar ‗n bede om met God
se genade, oor en voor te begin. Om in my eie stukkie
donkerte, die Lig van Jesus Christus te ervaar.
Geseënde Kersfees 2011!
(Ds. Willie Badenhorst, NG Kerk Port Nolloth)
2
2
2