Superspar Springbok - Nuwe dimensies

Hoe om jouself te verbeter
Die meeste van ons streef daarna om onsself te verbeter.
Ons almal maak egter foute en doen soms die verkeerde
dinge. Dit is inderdaad maklik om in die slaggate van die lewe
te val en agterna skaam en skuldig daaroor te voel.Die vraag is
of daar wel riglyne bestaan om 'n beter mens te raak. Watter
karaktertrekke kan ek navolg in my soeke om as 'n persoon te
ontwikkel en groei as 'n mens te ervaar. Ek bespreek enkele
aspekte wat jy prakties in jou lewe kan implementeer:
1. Leef met blydskap: Wanneer jy na die wêreld rondom
jou kyk, sien jy trane en verdriet, doodslag en wreedheid,
korrupsie en onbevoegdheid, onregverdigheid en
wanhoop. Ons leef inderdaad in moeilike tye waarin
finansiële bekommernis en misdaad en stukkende
verhoudinge hoogty vier. Jy kan toelaat dat hierdie dinge
vir jou te veel raak. Jy kan in depressie verval en in
spanning leef en negatief na die lewe kyk. Maar jy kan
egter ook met 'n blydskap en positiewe uitkyk elke dag
aanpak en leef. Dit is 'n keuse wat jy maak.
2. Moenie gierig lewe nie: Ons leef in 'n tyd waar 'n mens
se sukses, en ook jou oorlewing, in terme van geld
bereken word. So baie dinge draai om geld. Jy beoefen 'n
beroep en gaan werk toe om geld te verdien. Jy het geld
nodig om sekere dinge te kan bekostig en om voorsiening
vir jou oudag te maak. Amper alles draai maar geld of die
tekort aan geld. Maar tog is daar belangriker dinge as
geld. Dinge soos liefde, vriendskap, ondersteuning vir
mekaar en jou geloof. Mense belieg en bedrieg, besteel en
verraai mekaar vir geld. Moenie net op geld fokus nie,
want dit verskraal jou menswees. Stel jou visier vir die
lewe hoër as net geld.
3. Leef rustig: Die wêreld waarin ons lewe is 'n deurmekaar
en 'n gejaagde lewe. Ons jaag voort en woeker met
nuttelose plesier en bemoei ons te veel met ander mense
se sake. Ons probeer mense beïndruk en veg om as
wenner uit die rotresies te tree. Wees eerder rustig en
kalm in wat jy doen. Fokus op die goeie dinge in jou lewe
en arbei getrou in jou roeping as mens.
4. Doen die goeie dinge: Leef 'n goeie lewe en doen die
regte dinge en vermy om verkeerde dinge te doen.
Dikwels is dit juis die verkeerde keuses en handelinge wat
veroorsaak dat ons in 'n verknorsing beland en dan kla
ons oor die noodlot wat teen ons is. 'n Mens hoef net die
koerante deur te blaai om die boosheid te sien van hoe
mense mekaar vertrap en besteel en belaster. Wees jy 'n
voorbeeld vir jou naaste deur die goeie elke dag te doen.
Laat jou woord jou eer wees. Behandel mense met respek.
Wees geduldig en bied jou hulp aan mense wat in nood en
krisis is.
5. Moenie in onnodige stryery betrokke raak nie: Staan
jou man is nodig en jy behoort dit ook so te doen. Stel jou
saak en hoe jy dinge insien. Dis egter nie nodig om in 'n
uitgerekte argument betrokke te raak nie. Elkeen is
immers geregtig op sy eie mening. Soveel
byeenkomste is bederf met 'n nuttelose getwis.
Soveel gesinne leef met stukkende bande as
gevolg van rusies. Soveel geskeurde verhoudinge
as gevolg van 'n stryery. Die wyse Salomo het
gesê: "Dit is 'n eer vir 'n man om van twis weg te
bly, maar elke sot breek los."
6. Wees 'n lewende voorbeeld: Hierdie is 'n
moeilike een. Ons almal maak foute en dikwels
besef ons nie die impak van ons voorbeeld op
ander mense nie. Ons woorde en dade en ons
voorbeeld beïnvloed al die mense rondom ons.
Doen wat reg en eerbaar is deur jou woorde en jou
dade. Leef dan so dat jy as 'n positiewe rolmodel
dien vir enigeen met wie jy in aanraking kom.
`n Verhaal wat inspireer….Ons gestremde seun
Ons blommekyk was heerlik en baie mooi, veral van Kamieskroon af ondertoe
en selfs tot in Calvinia! Die dorp was oortrek met blomme!
Baie dankie vir die heerlike oorbly en kuier by julle. Jy het my sommer
geinspireer met alles waarmee jy jou besig hou. Jy is vir ons almal 'n voorbeeld
van wat gedoen kan word.
Jy het gevra dat ek iets oor ons seun, Simon skryf en nou is dit skielik nie so
maklik nie. Laat ek begin deur te sê dat hy 'n werklike sonstraal en bestiering
van die Here is in ons almal se lewens. Alles wat ons is of doen sou armer
gewees het sonder hom in ons lewens.
Hy is vanaf geboorte serebraal gestrem a.g.v. 'n tekort aan suurstof voor,
tydens, of net na die geboorte. Ons het nooit gevra hoekom nie en die genade
gekry om hom van die begin af as 'n geskenk van die Here te aanvaar. Hy het
nie die gewone mylpale van ontwikkeling behaal nie en van 6maande af fisio-
arbeids- en spraakterapie ontvang. Die spraakterapie was om die mondspiere
en tong te kry om kos te kan inneem en verwerk om te sluk. Hy het dit gehaat,
maar ons het deurgedruk. Ons moes 'n besluit neem of ons al ons aandag aan
hom gaan gee om hom tot sy volle potensiaal te laat ontwikkel, of om 'n
gebalanseerde huwelik en gesinslewe te bou rondom hom met sy behoeftes.
Ons het die tweede gekies en ek dink dit is ook 'n groot genade! Te veel
huwelike met gestremde kinders hou nie. Ek en Fanie is nog dolgelukkig
getroud na 26 jaar en maak regtig tyd vir mekaar, soos die naweek se
blommekyk!
Hy was in die Kaap en nou hier in Potch in spesiale skole met baie spesiale
onderwysers en het goed gevorder. (stadig, maar tog)
Hy is vanaf 19 jaar in die week in 'n huis, Simonsoord, versorg, wat ons self op
die been gebring het vir nie-selfversorgende mense. Daar was 5 ander en 'n
huismoeder en versorgers in die huis. Naweke het ons hom weer huistoe
gebring. Die huis was egter op die langduur nie volhoubaar nie, aangesien
finansies altyd 'n probleem bly vir die meeste mense en die bestuur daarvan nie
los van ons sou kom nie. Ons het dus die huis toegemaak einde Junie 2011 en
moes weer begin soek vir 'n meer permanente plek, wat onafhanklik van ons as
ouers kon aangaan. Ons het 'n baie oulike oord in Rustenburg ontdek, wat hom
as alles goed gaan teen middel Oktober kan inneem. Spes Bona sorg vir
ongeveer 50 mense met verskillende gestremdhede en hul ingesteldheid is een
van: of die persoon pas by ons in, of ons pas by hom aan. Daar is nie 'n manier
dat hulle nie vir iemand 'n tuiste kan skep nie.
Dit is vir ons as ouers 'n wonderlike gerusstelling en ons sien uit na sy inskakel
daar.
Die 5 jaar in Simonsoord het die groot voordeel vir ons gebring dat ons kon sien
Simon pas aan by ander mense wat vir hom sorg en hy word verskriklik lief vir
sy huismense wat soos hy is.
Ons is dus net dankbaar vir al die ondersteuning en liefde wat ons nog altyd
ontvang van die gemeentes waarin Fanie gewerk het, asook die breër
gemeenskap waarin ons leef. Die gemeente hier in Potchefstroom het ons
gehelp om 'n trust op die been te bring vir sy versorging en dit staan tans net
onder R1miljoen!
Baie dankie dat jy geluister het en doen daarmee wat jy goedvind.
Laat dit goed gaan met julle daar aan die Weskus en baie seën op al die werk
wat jy doen.
Groete uit Potch.
Judie Coetzee
25
www.da-namaqualand.co.za
25
19
25 17 20 22
23
21