NASPERS BEPERK JAAR VERSLA G 2003

AANTEKENINGE
AANTEKENINGE BY DIE
GEKONSOLIDEERDE FINANSIËLE JAARSTATE
(vervolg)
2. Vernaamste rekeningkundige beleid (vervolg)
56 NASPERS BEPERK JAARVERSLAG 2003
(h) Voorraad
Voorraad word waardeer teen die laagste van kosprys of netto realiseerbare waarde. Voorraad se kosprys
word in die algemeen bereken op die eerste-in-eerste-uit-metode (EIEU). Produksiekoste sluit direkte arbeid,
’n toepaslike gedeelte van bokoste en ander direkte koste in, maar sluit finansieringskoste uit. Netto
realiseerbare waarde verwys na die verwagte verkoopprys minus enige voltooiingskostes en verkoopskostes.
Afskrywings word gemaak vir verouderde, onbruikbare en onverkoopbare voorraad en vir latente skade wat
eers aan die lig kan kom wanneer voorraad gebruik of te koop aangebied word.
(i) Handelsdebiteure
Handelsdebiteure word gedra teen verwagte realiseerbare waarde. Twyfelagtige debiteure word beraam op
grond van ’n evaluering van uitstaande bedrae op jaareinde. Oninbare skulde word afgeskryf in die jaar waarin
dit geïdentifiseer word.
(j) Kontant en kontantekwivalente
Kontant en kontantekwivalente bestaan uit kontant voorhande, onmiddellik opvraagbare deposito’s by banke
en beleggings in geldmarkinstrumente met ’n maksimum leeftyd van drie maande vanaf aankoopsdatum. Sekere
van hierdie kontantsaldo’s is beperk vir onmiddellike gebruik ingevolge ooreenkomste met banke en ander
finansiële instellings. Vir doeleindes van die kontantvloeistaat word kontant en kontantekwivalente aangebied
netto van bankoortrekkings.
(k) Voorsienings
Die groep skep voorsienings as daar ’n huidige wetlike of afgeleide verpligting bestaan wat voortvloei uit ’n
vorige gebeurtenis, dit waarskynlik is dat toekomstige ekonomiese voordele uit die groep sal vloei ten einde
die verpligting af te los, en daar ’n betroubare raming van die bedrag van die verpligting gemaak kan word.
Die groep erken die geraamde verpligting op alle produkte onder waarborg soos op die balansstaatdatum.
Die groep erken ’n voorsiening vir beswarende kontrakte wanneer die onvermybare koste die verwagte voordele
uit die kontrak oorskry. Herstruktureringsvoorsienings word erken gedurende die tydperk waartydens die groep
’n wettige of konstruktiewe verpligting oploop om te betaal. Koste verbonde aan die voortgesette aktiwiteite van
die groep word nie vooruit voorsien nie.
(l) Belasting
Belastingkoerse
Die standaardkoers gebruik vir normale Suid-Afrikaanse maatskappybelasting is 30%.
Sekondêre Belasting op Maatskappye (SBM) is bereken teen 12,5%.
Internasionale belastingkoerse wissel van jurisdiksie tot jurisdiksie.
Uitgestelde belasting
Uitgestelde belasting word ten volle voorsien volgens die balansstaat-aanspreeklikheidsmetode vir alle
tydberekeningsverskille wat ontstaan tussen die belastingbasis van bates en laste en hulle drawaardes vir finansiële
rapporteringsdoeleindes. Huidige statutêre koerse word in die bepaling van uitgestelde belasting gebruik.
Ingevolge hierdie metode moet die groep voorsiening maak vir uitgestelde belasting met betrekking tot verkrygings,
op die verskil tussen die billike waardes van die netto bates verkry en hul belastingbasis. Voorsiening vir belasting,
hoofsaaklik terughoubelasting, wat kan ontstaan met die uitkering van behoue inkomste, word slegs erken tot
die mate wat daar ’n huidige voorneme is om sodanige reserwes uit te keer.
Die belangrikste tydberekeningsverskille ontstaan op waardevermindering van eiendom, aanleg en toerusting,
ander ontasbare bates, voorsienings en ander bedryfslaste, vooruitontvange inkomstes en belastingverliese
oorgedra. Uitgestelde belastingbates word erken tot die mate dat dit waarskynlik is dat toekomstige belasbare
inkomste beskikbaar is om die onbenutte belastingverliese en tydberekeningsverskille te kan benut.
Sekondêre Belasting op Maatskappye (SBM)
Dividende verklaar is onderhewig aan SBM, maar word verminder met dividende ontvang gedurende die
dividendsiklus ten einde die SBM-aanspreeklikheid te bepaal. Indien die dividende wat gedurende die siklus
ontvang is die dividend verklaar oorskry, ontstaan daar geen SBM-verpligting nie. Enige sodanige oorskot
word oorgedra na die volgende dividendsiklus en word as SBM-krediete in die belastingaantekening openbaar.
Indien die dividend verklaar die dividende ontvang gedurende die dividendsiklus oorskry, ontstaan die
SBM-verpligting teen die heersende SBM-koers. Die SBM-uitgawe vorm deel van die belastinguitgawe
in die inkomstestaat in die tydperk wat die dividend betaal word.