Lebe Moten un Frünnen - Quickborn. Vereinigung für ...

Ut de Vereenigung
Dit Johr ward dat ok wedder een Beukermesse in’n Lichwarksool vun de
Toepfer-Stiften geben. Dat liggt al fast: Vun’n 6. bet 8. November.
Dat gifft noch jümmer den Biroot, wo de Quickborn mit de Stiften tohoop
de ’Bibliotheksgespräche‘ in de Nedderdüütsche Bibliothek utdinken deit
un ok de Lesungen in’n Lichtwarksool. Dat Programm för dit Johr is al
meist trecht. Wokeen dor mehr vun weten will, mag Wolfgang Müns frogen.
Wi hebbt ok wedder öber de Tosomenarbeid mit dat ’Museum der Arbeit‘
nodacht. Dor schall dit Johr wedder een gemeensomen Obend tostann
komen. Un dat ward öber Fischeree gohn. Wi ward dat to rechte
Tied bekannt moken.
Ik kummt nu op’t Letzt wedder trüch no unsen Vereen:
Wi sünd nich veel weniger worrn, man, ok nich mehr. Wi sünd alltohoop
bet op de Utnohmen nich mehr so richdig knackig un jung. Un wi weuhlt
op unsen Acker man mit wenig Lüüd.
Liekers klappt dat jümmer mit de Redaktion, de ik vun Harten för all de
Arbeid danken müch. De schrifft nich blots un mookt de Heften. De mookt
ok de Post un verschickt allens. Dat köst Tied un Knööf bruukst du ok för
de sworen Kassens un so. Dat kummt allens nich vun sülbens. Dorüm
muttst du den Quickborn al fix geern hebben, winn du di dat opsacken
deist. Liekers hebbt wi jüm, de Frons un Mannslüüd: Bolko un Peter von
Essen, Corl un Johanna, Hans-Jochen un Thomas, Ingrid un ehren Vadder
Heinz, de nu mit bald 85 Johr noch jümmer op unsen Kroom oppassen
deit. De uns sien Huus öberlett un noch Kaffee kookt un Koken backt,
wenn uns’ Frünnen bigoht un wöllt wedder mol een Heft verschicken.
Dat kummt allens nich vun sülbens. Un is nich sülvstverständlich!
Hier hebbt wi veel to danken.
Jüst so de Lüüd, de so för de Heften schrievt. Wi köönt je keen Honorar
betohlen. Un so mookt se dat all ümsünst. Kiekt man mol op de Listen in
uns’ Heften, wo dat heten deit: ’Mitmookt hebbt disse Lüüd‘.
Dat is’n groten Hümpel un wi bedankt uns vun Harten.
Kumm ik to den Biroot, de sik jümmer tohoop mit den Vörstand dropen
deit.
De lütte Vörstand mit sien veer peoples kunn so un so nix alleen vör de
Hand bringen, wenn dat nich noch de annern geev.
98