Flensburg Journal - 233 Februar 2022

Poppen vun fröher
OPSNAPPT
... un allens op Platt!
Weetst du dat noch: de „Augsburger
Puppenkiste“? Wi un unse Kinner
sünd dormit groot woorn – mit düsse
Poppen an’t Tau, de velen verscheden
Marionetten. In’t Feernsehn weren se
to sehn, mit ganz veel Stücken. Blots
de „Tagesschau“ is öller! De woor an’n
25. Dezember 1952 dat eerste Mal
sennt – un blots veer Week later, an’n
21. Januar 1953 keem „live“ dat
Stück „Peter und der Wolf“ ut Augsburg.
Un denn güng dat wieder, en Erfolgsgeschicht,
so kann man seggen.
Eerst kemen luder klassische Stücken,
so as „Gullivers Reisen“ un „Doktor
Faustus“. Man dorna schreven de
Autoren extra wat för de Poppenkist,
dor weer de „Familie Mumin“ – un denn
50 mal „Das Sandmännchen“! Wokeen
weet dat vundaag noch, dat de Augsburgers
dor mal achter steken.
„Jim Knopf und Lukas, der Lokomotivführer“
is een vun düsse Kultstücken
– un noch veel mehr kemen achterna:
„Kater Mikesch“ un „Der Löwe ist los“
oder ok „Das Urmel“ un „Kleiner König
Kalle Wirsch“. Vele Kinnerböker so as
„Das Sams“ un „Katze mit Hut“ maak
man för dat Poppentheater torecht –
un bet vundaag hen gifft dat de feinen
Stücken as Films to kieken. In’t Feernsehn
kaamt se nich mehr – de Feernsehlüüd
meent, dat is allens en beten
ut de Tiet fullen. Schaad egentlich.
Un liekers: Ok de Lütten vundaag
möögt dat noch kieken un hebbt Spaaß
doran. Dor is keen Hektik bi de Poppen
– un ok wenn veel passeren deit, de
Marionetten köönt nu mal nich so gau.
Mi dünkt, jüst dat is in unse Tiet mit
de gauen Biller gor nich so verkehrt. Ik
kann mi tominnst noch besinnen, wo
faszineert ik as Kind – un domals weer
ik seker al 7 oder 8 Johr oolt – vun
Lukas sien Lokomotiv weer. Un dat Urmel,
dat op eenmal ut dat Ies keem! De
Geschichten weren eenfach un goot
to begriepen – un de Musik dorto weer
ok ganz besünners. Wat weer dat för
en Spannung, wenn de Dören vun de
hölten Poppenkist opgüngen.
Ik glööv, ik koop mi mal so en Film för
mien Enkelkinner – un denn gaht wi
mal tosamen in’t Poppenkist-Kino,
un wenn dat ok man op den PC is, dat
maakt doch nix.
Marianne Ehlers
Illustration: Thomas Becker
FLENSBURG JOURNAL • 02/2022
21