José Miguel de Azaola Urigüen - Euskomedia Fundazioa

74
Taldearen jarduera biziaren berri ematen digu datu batek: 1940-
1941 ikasturtean 56 bilera egin zituen. Horietan hainbat mintzagai
erabili zituzten: eleberri pikareskoa, grafologia, «atomo eta radiumaren
edertasuna »; hizketaldi filosofikoak Kant, Ortega, Johannes Hessen eta
Balmesi buruz; «Musika eta matematikak»; «XIX. mendeko janzkera
egokia»; Dickens eta Fernando VI.ari buruz. Horietaz gainera, musika
errezitaldiak, entzunaldiak eta iruzkinez lagunduriko irakurketak. Eta
omenaldi bat Café Suizo-ri, 1941eko abenduan, afari-merienda eta
musika zein literatura saioekin. Gainera, San Joan Gurutzekoaren
laugarren mendeurrenaren kariaz, hiru hitzaldi antolatu zituzten espainiar
mistikaren aditu gailenen ardurapean, horien artean Gerardo Diego
(1942ko udazkena), eta Migel Unamunoren heriotzaren bosgarren
urteurrenean, 1941eko abenduraren 31n, haren jaiotetxean plaka bat
ezarri eta gero literatura bilera bat egin zuten Carlton-en.
Álea-k sei literatura koaderno monografiko argitaratu zituen,
taldearen jardueren berri ematen zutenak. Alfonso XIII-a Institutuko
paraninfoko atean saltzen ziren. Aurreneko alea, 1942ko urrikoa, Pablo
Bilbao Aristeguiren lan bati eskaini zitzaion: «Santa Teresa de Jesús: su
valor literario en el Libro de la Vida». Horren ondoren kaleratuko ziren:
«Cántico Espiritual» (Blas de Otero); «Síntesis de la primera parte de
‘Fausto’» (José Miguel de Azaola); «Base humana y divina de la mística»
(Manuel Mª Arredondo); «El idilio de Valldemosa: Chopin y Jorge Sand»
(Esteban Calle Iturrino). Álea taldeko seigarren eta azken koadernoak,
1944 urtekoak, Antonio Elíasen «Edertasun musikalaren osagaiak» gaiari
buruzko hitzaldi bat erreproduzitu zuen.
José Miguel de Azaolaren interesen zabaltasunaren eta aldeaniztun
ezagutza intelektualaren erakusgarri gisa, are bere hogei urteen
erditsuan, aski da kontuan hartzea 1938ko ekainetik 1942ko otsailera
bitartean eman zituen hitzaldien gaien askotarikotasuna: Bilboko
fundazioa, europeismoaren krisia mundu gerraren ondorioz, Suitzako
erreforma eta Ulrich Zwingli, germaniar inbasioen eragina
kristautasunean… Pasado, presente y futuro de Álea en su tercer
centenario bezain izenburu ironikoa duen beste batez gainera.
1941eko ekainean, Campos Antzokian haren Síntesis de la primera
parte de ‘Fausto’ obra estreinatu zen; bertan protagonista gisa parte
hartu zuen berak, Álea-ko kideek osaturiko antzezleen zerrenda buru.