Raddþjálfun einstaklinga með parkinsonsveiki: Mat á ... - Skemman

til staðar til að hvetja þau áfram í heimaæfingum og minna á þær nema þau sjálf og makar þeirra. Það
var því minni hvati til þess að stunda heimaæfingar eftir að námskeiðinu lauk.
Þessar niðurstöður benda til þess að þótt mikil áhersla hafi verið lögð á heimaæfingar hafi ekki
tekist að gera þær að daglegum þætti í lífi þátttakenda eins og vonast var til. Svör NA og EÓ benda þó
til þess að þeim finnist heimaæfingar nógu mikilvægar til að gera þær í hverri viku. Allir þátttakendur
sögðu að þeim líkaði vel eða mjög vel við raddæfingarnar sem þeir lærðu og að þeim líkaði vel eða
mjög vel við sterku röddina sem þeir æfðu á námskeiðinu. Þetta viðhorf ætti að ýta undir að
heimaæfingar verði daglegur hluti af lífi þátttakenda en það hefur þó ekki nægt.
Takmarkanir þessa hluta rannsóknarinnar voru þær að aðeins þátttakendur voru spurðir um
heimaæfingar en ekki makar þeirra. Það hefði gefið heildstæðari mynd af heimaæfingum ef makar
þátttakenda hefðu jafnframt svarað þessum spurningum. Einnig fólust takmarkanir í því að spyrja
þátttakendur spurninga eftir á þar sem krafist var að þeir rifjuðu síðustu vikur upp sem getur verið erfitt
fyrir marga. Svörin gátu því orðið óáreiðanleg og sem dæmi um það er svörun EÓ einum mánuði eftir
að námskeiðinu lauk. Þar sagðist hún gera heimaæfingar að jafnaði einu til tvisvar sinnum í viku en að
hún gerði langt /a/ þrisvar til fjórum sinnum í viku. Ef hún gerir langt /a/ svo oft er hún í raun að gera
heimaæfingar þrisvar til fjórum sinnum í viku en ekki einu til tvisvar sinnum. Það hefði verið hægt að
bæta þennan hluta rannsóknarinnar, meðal annars með því að spyrja maka og þátttakendur reglulega
um heimaæfingar.
5.5 Styrkleikar og takmarkanir rannsóknar
Ástæða þess að einliðasnið var valið til að svara rannsóknarspurningunum var að með því var hægt
að gera margar mælingar á sama einstaklingnum og fylgjast þannig náið með breytingunni sem varð
vegna íhlutunar. Mikill dagamunur getur verið á einstaklingum með parkinsonsveiki og í einliðasniði
eru margar mælingar gerðar fyrir þjálfun þannig að þó einstaklingurinn eigi einn slæman dag vega
hinar mælingarnar upp á móti honum.
5.5.1 Innra réttmæti
Innra réttmæti vísar til þess að niðurstöðurnar gefi rétta mynd af orsakasamhenginu milli frumbreytu og
fylgibreytu. Þegar einliðasnið er notað er mælt með að lágmarki þremur mælingum á grunnlínuskeiði
en æskilegt er að þær séu fleiri og að ekki sé hætt að gera mælingar á grunnlínuskeiði fyrr en
grunnlínan er orðin stöðug. Það er gert til þess að auðveldara sé að draga ályktanir um
orsakasamhengið milli frumbreytunnar og fylgibreytunnar. Í þessari rannsókn voru grunnlínumælingar
þrjár og í sumum tilvikum varð grunnlínan ekki stöðug og halli hennar lá upp á við í sömu stefnu og
gert var ráð fyrir að íhlutun myndi hafa áhrif. Þetta veldur því að munurinn er ekki alltaf greinilegur í
sjónrænni greiningu og er það ógn við innra réttmæti. Til að auðvelda túlkun var ákveðið að nota
marktektarpróf staðalfráviksborða. Í því marktektarprófi er gert ráð fyrir að minnsta kosti fimm
grunnlínumælingum til að fá mynd af raunverulegri dreifingu hegðunarinnar áður en þjálfun hefst. Þar
sem mælingarnar í þessari rannsókn voru aðeins þrjár er ekki víst að þær sýni raunverulega dreifingu
á grunnlínuskeiði. Það styrkir þó innra réttmæti rannsóknarinnar að áhrif íhlutunar liggja alltaf upp á við
eða beint miðað við grunnlínuna en ekki niður á við. Það bendir til þess að þjálfunin hafi orsakað
61