Raddþjálfun einstaklinga með parkinsonsveiki: Mat á ... - Skemman

5.5.2 Ytra réttmæti
Ytra réttmæti segir til um að hve miklu leyti niðurstöður yfirfærast á aðra einstaklinga. Hægt er að
segja að niðurstöður þessarar rannsóknar yfirfærist á þá einstaklinga sem eru greindir með
parkinsonsveiki, hafa væga til miðlungs vanhreyfniþvoglumælgi, taka parkinsonslyf, hafa ekki fengið
raddþjálfun áður, hafi greinst fyrir minna en 10 árum, eru metnir á HY stigi 1–3 og hafa ekki farið í
skurðaðgerð á heila né fengið aðra hjarta-, æða- eða taugasjúkdóma sem hafa áhrif á tal.
Það telst sem takmörkun á ytra réttmæti þessarar rannsóknar að þátttakendur voru fáir og ályktanir
um niðurstöður byggjast einungis á þeim tveimur þátttakendum sem luku þjálfun. Yfirleitt er miðað við
að lágmarki þrjá þátttakendur svo hægt sé að yfirfæra niðurstöður yfir á aðra einstaklinga. Það er þó
mat rannsakanda að í þessu tilviki hafi verið betra að nota einliðasnið til að svara
rannsóknarspurningunum en hóprannsókn þar sem hópmeðaltöl jafn sundurleits hóps segja ekki mikið
um raunveruleg áhrif þjálfunar. Sem dæmi má nefna að 12 þátttakendur á námskeiðinu höfðu fengið
svipaða raddþjálfun áður og þar sem rannsóknir hafa sýnt að árangur LSVT ® viðhelst allt að tveimur
árum eftir þjálfun gæti verið að hópmeðaltal þessa hóps gæfi ranga mynd af áhrifum raddþjálfunar á
raddstyrk. Rannsóknir þar sem þátttakendur eru fáir geta gefið mikilvægar upplýsingar og
vísbendingar sem hægt er að nota til að skipuleggja og byggja upp stærri rannsóknir.
Það hefði styrkt rannsóknina ef fleiri mælingar hefðu verið gerðar á grunnlínuskeiði og
íhlutunarskeiði og einnig ef hægt hefði verið að nota snið margþætts grunnskeiðs. Nokkuð góð stjórn
var á truflandi breytum eins og lyfjagjöf og þreytu og reynt var að hafa stjórn á öðrum breytum með
fingrafimiprófi. Mælitækin sem notuð voru til að mæla raddstyrk, tíðnisvið og sjálfsmat voru með góðan
áreiðanleika og réttmæti en áreiðanleiki og réttmæti annarra mælitækja var minni. Það er því hægt að
draga sterkari ályktanir um áhrif þjálfunarinnar á raddstyrk, tíðnisvið og sjálfsmat en um áhrif hennar á
raddgæði og heimaæfingar.
5.6 Meðferðarform
Þrátt fyrir að þjálfunin hafi ekki verið eins þétt og áköf og LSVT ® virðist hópþjálfun eins og veitt var hér
geta skilað sér í auknum raddstyrk þátttakenda sem varir í að minnsta kosti einn mánuð. Aukning í
raddstyrk varð þó minni en í rannsóknum á áhrifum einstaklingsmeðferðar. Þjálfunin í þessari
rannsókn fór fram á lengri tíma eða átta vikum samanborið við fjórar. Þó að meðferðartímar hafi verið
jafn margir eða 16 má búast við því að samanborið við einstaklingsmeðferð hafi hver einstaklingur
fengið minni beina þjálfun og einstaklingsbundna endurgjöf frá meðferðaraðilum. Reynt var að vinna
gegn því með því að lengja meðferðartímann úr 60 mínútum í 90 mínútur og þannig fengu allir
þátttakendur 43 – 48 mínútur í beina þjálfun samanborið við 50 mínútur í LSVT ® .
Niðurstöður þessarar rannsóknar eru í samræmi við aðrar rannsóknir sem benda til þess að þetta
meðferðarform geti nýst vel til að auka raddstyrk einstaklinga með parkinsonsveiki. Þessi rannsókn
bendir jafnframt til þess að hópþjálfun sem veitt er á göngudeild eða í svona námskeiðsformi, með
minna aðhaldi og áminningu frá umhverfi en í inniliggjandi meðferðarformi beri einnig árangur.
63