Raddþjálfun einstaklinga með parkinsonsveiki: Mat á ... - Skemman

6 Ályktanir
Niðurstöður rannsóknarinnar benda til þess að raddþjálfun sem byggist á meðferðarforsendum LSVT ® ,
er aðlöguð að hópþjálfun og fer fram tvisvar í viku í átta vikur, 90 mínútur í senn auki raddstyrk
einstaklinga með parkinsonsveiki í upplestri og sjálfsprottnu tali og að þessi aukni raddstyrkur haldist í
allt að einn mánuð eftir þjálfun. Einnig gefur rannsóknin vísbendingar um að raddstyrkur í sjálfsprottnu
tali með tvískiptri athygli og tíðnisvið raddar geti aukist eftir raddþjálfun í hópi. En þar sem þessi
aukning varð aðeins hjá einum þátttakanda eru þetta aðeins vísbendingar. Ef tekst að halda raddstyrk
þegar athygli er tvískipt má ætla að hann haldist frekar í daglegum aðstæðum þar sem mikið er um
áreiti. Niðurstöður mælinga á raddstyrk í langri röddun eru misvísandi og því erfitt að draga ályktanir
um þær.
Sjálfsmat þátttakenda á eigin rödd og raddvanda bendir til þess að þátttakendum hafi sjálfum ekki
fundist þær breytingar sem urðu á raddstyrk og tíðnisviði hafa áhrif á raddtengd lífsgæði þeirra. Mat á
raddgæðum sýndi að raddgæði eins þátttakanda voru metin betri strax eftir þjálfun og einum mánuði
eftir þjálfun en það gefur vísbendingar um að raddgæði geti orðið betri eftir raddþjálfun í hópi.
Upplýsingar um heimaæfingar benda til þess að þó viðhorf þátttakenda hafi almennt verið jákvætt hafi
ekki tekist að gera þær að daglegum þætti í lífi þeirra eins og nauðsynlegt er til að stuðla að yfirfærslu
og viðhaldi á árangri þjálfunar.
65