KölnerLeben Juni/Juli 2021

Vergnügliches 33
„... baue mer uns e Ness“
Jeschrevve vum Katharina Petzoldt
Illustration: Freepik
„Maache mer’t de Schwalve noh, baue mer uns e
Ness.“ Dat hät bestemmp och et Frollein Elster för
ehre Kavalöres jesaat. Doför mooten se ävver ehsch
ens e jot Plätzje söke, un dat hann se jenau en däm
Baum vör mingem Köchefinster jefunge. Vun mingem
Stohl am Köchendesch uss kunnt ich die zwei en
ehrer Amberaasch bespingkse.
„Lor ens, Elsje, he, dat ess doch en schö Plääzje, ne?“
„Nit schlääch“, meinte dat. „Die drei Äss deilen sich
wie en Messjaffel, vun he ha’mer de janze Stroß em
Bleck, un dat Hus ess och wick jenohch fott“. „Jo, do
häss rääch! Je flöcker mer aanfange, öm esu flöcker
si’mer fädich un künne Huhzick halde. Ich hollen dat
Baumaterial un do deis baue!“
Jesaat, jedonn! Voll Iefer flüch der Här Elstermann
loss un kütt noh e paar Minüttcher met nem lange
dönne Ässje widder. Et Elsje versök tireck, dat en
de richtije Positur ze bränge. „Do häss de ävver e
lang Stöck ussjesook. Lor ens, wat ich för ne Brasel
hann, dat he richtich ze zorteere.“ „Ich helf der jet,
loß mich ens draan … Jangk ens met Dingem lange
Stätz op Sick, do steis mer en de Föß.“ „Nä, wat ess
dat en Avrackerei. Die Stöckelcher dürfe nit esu lang
sin.“ „Jottzedank, jeschaff! Ich ben jlich widder do.“
„Bräng dismol ävver nit esu e lang met, un e bessje
kromm kann et och sin, domet mer och e schön rund
Nessje krijje.“ „Ess jot.“
Der Här Elstermann flüch fott
un kütt koot drop met nem
neue Stippche widder.
„Jo, dat pass prima he en
dat Loch eren!“ Et Elsje
wor em Baufeber. „Dat
weed wirklich e schö
Ness je. Freus de dich, Leevje?“
„Frohch nit esu vill, un
helf mer ens, dat neu Stippche
richtich ze plazeere. Wat ne
Öchel! Dä Ass vum Baum ess em Wäch. Ess dat he
eng! Ich allein schaffen et nit. Noch ens zesamme: Eine,
zwei, drei, Hau Ruck! – Dä, jetz ess et erunder jefalle.
Ich hann der doch jesaat, dat die Stöckelcher nit
esu lang sin dürfe.“ „Häss do jetz vör, de janze Zick
eröm ze nöttele? Helf mer leever, de richtije Läng
ze finge!“ „Enää! För hück hann ich mich jenohch jeplohch.
Ich hann der Schnabel voll! Ich muss e Püüsje
maache. Morje ess och noch ene Daach.“
Su kunnt ich die zwei hinger minge Köchejadingcher
belore un hatt ming Freud draan. Wie dat Ness dann
och noch met Mutt verputz wor, kunnten se Huhzick
feere. Et do’te nit lang, do lohchen drei klein Eiercher
em Nessje, un et Elsje soß jedöldich drop un dät se
wärm halde. Der Elsterich hatt sing Famillich immer
em Auch un wör vör luuter Stolz bal jeplatz.
Foto: lschb
Anzeigen
Zertifizierter Anbieter von
Betreuungsleistungen nach
§§ 45a, 45c und 45d SGB XI
Mer ungerstötze
mit Tatkraff un Hätz!
Wir rechnen Entlastungsleistungen,
Verhinderungspflege und Verordnungen
direkt mit den Krankenkassen ab.
Die Alltagsbegleiter Köln • www.diealltagsbegleiter.de • +49 (0) 221 30 16 77 86
hallo@diealltagsbegleiter-cgn.de•Neusser Straße 27 – 29 • 50670 Köln
KölnerLeben Heft 3 | 21