Leve Lesers - Quickborn. Vereinigung für niederdeutsche Sprache ...

REBECCA BEHRENS (13 JAHRE ALT)
Worum de Heven blau is
Du wullt weten, worum de Heven blau is? Jo, dat segg ik di geern:
In verleden Tieden, as de Heven noch root weer, geev dat mol en Ries, de
hett Friedrich heten.
He weer en ganz, ganz leven Ries!
He much all Minschen geern, un sünnerlich Kinner harr he von Harten
leev.
Du muttst aver weten, he harr de Klöör ‚Blau‘ ok bannig geern.
Meist allens in sien Huus weer blau: blaue Wännen, blaue Gardinen, en
blauet Sofa un – jo- sogor en blauen Kiekkasten!
Friedrich weer en heel kandidel un gootmödig Kamerad, un he hölp de
Minschen so goot, as’t man güng. Jümmers, wenn de Minschen Smacht
harrn, böör Friedrich jem hooch na’n Heven, un se kunnen sik denn an’n
Maand satt eten. Du schasst weten, de Maand is ut Kees, richtig leckern
Kees! Sogor Friedrich kunn sik nich jümmers betehmen un hett af un an
ok en lüürlütt Stück Kees afbeten. So kümmt dat, dat de Maand männichmol
blots half oder as Seßel to sehn is.
Un wenn de Maand – oder beter seggt: de Kees – all weer, back Friedrich
en nieget Stück wedder an. Mit TESA! Tonehmen Maand! So eenfach is
dat. Aver du wullt jo hören, worum de Heven blau is un nich, wat mit
den Maand passeern deit. Also, eenmol kunn Friedrich nich slapen. Jichtenswat
weer nich richtig blau. He keek sik in sien riesig Huus um. Nix!
Allens weer blau! He leed sik trurig un nadenkern in’t Bett un dach: „Worum
heff ik blots dat Geföhl, dor is wat nich richtig blau? Wat Grotet,
dücht mi.“ Man denn sleep he liekers in.
As he den annern Morgen ut dat Finster keek, wuss he glieks Bescheed.
He smuustergrien: „De Heven!! De rode Heven!!! De deit mi bannig stören!
Dor mutt ik wat doon!“ Man, op welk Wies kunn dat gahn?
De plietsche Friedrich harr jümmers ’n poor Ammers blaue Farv in sien
Schuur stahn – un de weer waterfast!
Flink streek he den Heven blau an. „O, wo scheun !“, reep he glücklich.
De Lüüd, de jümmers mehr Slaap bruken doot as en Ries, worrn nu ok
waak En poor repen: „O, wat scheun, Friedrich!“ Dor frei he sik över.
Man anner Lüüd weern nich tofreden un fragen: „Friedrich, worum deist
du dat? Fraag uns doch vörher!“
8
22472Quickborn4-09-1.Korr. 8
15.12.2009, 10:06 Uhr