Descarga en formato PDF - Centro Ramón Piñeiro para a ...

Presentación
O número 6 de Cadernos de Fraseoloxía Galega ofrece cinco grupos de
estudos. O primeiro compóñeno catro reflexións sobre a doutrina
fraseolóxica de Valerii Mokienko (Fraseoloxía eslava de V. Mokienko por K.
Morvay; A relevancia da teoría da modelabilidade de Valerii Mokienko a través da súa
monografía ‘Fraseoloxía Eslava’ por C. Mellado Blanco; e dúas aplicacións
prácticas: Aplicación da teoría de modelos semántico-estruturais das locucións á
organización dun dicionario plurilingüe de sinónimos fraseolóxicos por E. Guerbek, V.
Mokienko e K. Vlasákova; Explicitación e implicitación fraseolóxica. Notas galegas
por X. Ferro Ruibal). O segundo compóñeno reflexións verbo das Colocacións
verbais: estabilidade fraseolóxica vs. combinatoria sintáctico-semántica por J.P. Larreta
e da Formalización lingüística dos adverbios compostos do catalán por D. Català
Guitart. O terceiro fórmano traballos que analizan o vello labor
fraseográfico (Hernán Núñez (1555) e Gonzalo Correas (1627): os primeiros
refraneiros galegos por G. Conde Tarrío) pero tamén os novos métodos
(Extracción automática de colocacións e modismos por A. Pamies Bertrán e J.M.
Pazos Granada; Estudo das colocacións a través da análise de corpus: un estudo práctico
das colocacións co verbo galego “caer” e o correspondente inglés “to fall” por M.C. Paz;
Por unha metafraseografía peninsular por K. Morvay). Un dos problemas máis
complexos da fraseografía e da tradución está nos niveis de uso, para a
primeira, e no de correspondencia, para a segunda: a eles aluden o traballo
Os rexistros e os niveis de lingua na fraseoloxía: unha aproximación descritiva das
locucións nun corpus textual galego por X.M. Gómez Clemente e mais O concepto
“correspondencia” na tradución paremiolóxica por J. Sevilla Muñoz, no cuarto
bloque. Por último, a didáctica da fraseoloxía, ausente aínda en boa parte dos
nosos estudos regrados, encontra aquí dúas propostas complementarias: A
fraseodidáctica: un eido da fraseoloxía aplicada por M.I. González Rey e Aplicacións
didácticas dos refráns por M.R. Soto Arias.
Cadernos de Fraseoloxía Galega procurará exhumar sempre algunha recadádiva
galega inédita. Neste caso Mª Carmen Paz Roca e Ana Vidal Castiñeira
ofrecen o Novo manuscrito paremiolóxico de Vázquez Saco que complementa a
voluminosa edición do número 5 deste Cadernos.
6