Fjölskyldubætur á Íslandi Fjárstuðningur vegna framfærslu barna ...

Í þriðja lagi er þróun fjárstuðnings á hvert barn mjög breytilegur eftir
barnafjölda. Í sumum tilvikum þá eykst fjárstuðningurinn með barnafjölda en í
öðrum tilvikum lækkar fjárstuðningurinn. Það er því ekkert skýrt mynstur að
sjá hvort fjárstuðningurinn aukist, minnki eða standi í stað þegar börnum
fjölgar. Ástæðan fyrir því er að heildarfjárstuðningur veltir á mörgum
tegundum bóta og annarra greiðslna sem lúta mismunandi lögum og reglum
og þegar allt er saman komið er ekkert skýrt mynstur á fjárstuðningi eftir fjölda
barna.
Í fjórða lagi eru margir bótaflokkar tekjutengdir sem gerir það að
verkum að tekjulægri foreldrar fá hærri bætur en tekjuhærri. Þetta á við um
námslán, barna-, húsaleigu- og vaxtabætur. Aðrir þættir hafa hins vegar mun
meiri áhrif á fjárhæðir fjárstuðnings en tekjutengingin. Þannig að þegar sagt er
að fjárstuðningur vegna framfærslu barna sé þarfamiðaður hér á landi, þá er
tekjutenging einungis einn af fleiri þáttum sem veldur því.
Heildarkerfi fjárstuðnings hér á landi skilar því að upphæðir eru mjög
breytilegar milli einstakra foreldra. Þær geta farið niður í núll og allt upp í 100
þús. kr. á hvert barn (á mánaðargrundvell) þegar allt er talið með. Kerfið skilar
því mjög breytilegum fjárstuðningi milli foreldra. Hvort það sé heppileg leið
eða ekki veltur að sjálfsögðu mjög á því hvert markmið með slíku kerfi sé. Þar
sem markmið almannatryggingar hér á landi er nokkuð á reiki um þetta, og
enn meira þegar rætt er um fjárstuðning vegna framfærslu barna, þá er ekki
unnt að leggja heildarmat á kerfið.
54