Dat Letzt - Quickborn. Vereinigung für niederdeutsche Sprache und ...

HANS-JOACHIM MEYER
En En Düvelsidee Düvelsidee
Düvelsidee
(Düsse Geschicht stammt ut dat Johr 2002. Domaals hebbt wi jüst den
Euro krägen.)
Paster Grothusen sitt an’n Disch un süüfzt. „Na? Is di wat infullen“, fraagt
sien Fro. – „Helpt nix“, seggt de Paster. „Wi mööt de Kark verkeupen.“
– „Wat seggst du dor? De Dreefaltigkeitskark verkeupen? Wo wi jüst
düt Johr groot fiern wüllt, dat uns Kark dreehunnertföfftig Johr oold
worrn is?“ – „Klor, dor kaamt wi eerst mit rut, wenn de Fiern vörbi
sünd. Man wat schüllt wi anners doon? Dat Geld ward knapper un knapper.
De Lü verdeent nix, un dat sleit düchtig up de Karkenstüür. Finnst
du dat bäter, wenn wi dat Geld bi de Hölp för de olen Minschen afknappst?
Oder bi’n Kinnergorn? Nee, denn verhökert wi lever de Kark.
Un dat is ok christlich dacht, meen ik.“ – De Fro schüddkoppt un kann
sik nich begeuschen. „Un wat ward ut uns Goddsdeenst? Wullt du di
mit de Johanniskark tohoopdoon?“ – „Säker, dat mööt wi woll. Heff al
mit Paster Krämer snackt, un he is inverstahn. Wi wesselt uns af. Enen
Sünndag preester ik de Lü wat vör, Krämer den annern Sünndag. So
löppt dat.“ – Gifft dat denn afsluuts nix, wo wi Geld herkriegen künnt?
Mööt wi sachs nochins een por Geschäftslü ansnacken?“ – „Dat is doch
so as meisttieds. De nix in de Melk to kreumen hebbt, de spendeert
wat. Man de Rieken, de hoolt jümehrn Duum up’n Büdel. Wi bruukt son
Slag Robin Hood, de dat Geld vun düsse Giezknüppels an de Lü verdeelt,
de dat neudig hebbt.“
De Fro sitt dor un överleggt. „Ik weet wat. Verseuk dat doch maal bi
uns Konkurrenz. Hest du dor al an dacht?“ – De Paster höllt sienen Aten
an. „Wat??? Du meenst wohraftig, wi schüllt bi den ...“ – „Klor, hest
richtig hört. Dat schüllt wi. Roop man glieks an. Mehr as nee seggen
kann he ok nich.“
De Paster steiht up, geiht röver na dat Telefoon, blädert in sien Notizbook
un tippt de Nummer in. An’t anner Enn rötert en wat piepsige
Stimm vun en junge Daam loos: „Hier is de Höll an’n Apparaat, Kunnendeenst.
Wat künnt wi för Se doon?“ – “Scheunen goden Dag ok,
hier Paster Grothusen, Horborg. Ik mutt ganz kott mit’n Chef snacken.
Is he upstunns bihuus?“ – „De Düvel? Nee, de is in Hannober up en
Workshop, Cotrolling in uns moderne Verwaltung oder sowat. Man sien
Grootmudder, de is dor, schall ik Se to ehr dörstellen?“ – „Dat doot Se
man, besten Dank ok.“
10