Dat Letzt - Quickborn. Vereinigung für niederdeutsche Sprache und ...

THEO GERDES
Wilhelm Wilhelm Busch Busch un un de de plattdüütsche plattdüütsche Spraak
Spraak
To ’n 175. Geburtsdaag van de Schrieversmann un Maler Wilhem
Busch
Vör 175 Jahrn, an 15. April (in Ostermaand) 1832 is Wilhelm Busch in
Wiensoal (Wiedensahl) geborn. Wiensoal, dat liggt tüschen Minden
un Hannover un weer domals so ’n lüttjet Dörp, war de Lü ’n ostfälisch
Platt snackten (un dat ok vandaag noch doon). Un ok uns lütt Wilhelm,
de öllst Jung van de Krämer un Koopmann Friederich Wilhelm Busch,
is darmit upwussen: de Vullwassen hebbt platt mit em snackt un Wilhelm
hett mit sien Späälkameraden ok woll platt snackt.
As Wilhelm neegen Jahr olt weer, hebbt siene Öllern em ut de
Dörpschool rutnahmen un in de Obhut van sien Unkel Georg Kleine
gäven, de weer Dörpspastor in Ebergötzen bi Göttingen. Unkel Georg
hett denn siene Utbildung in de Hand nahmen, war ok dat Malen un
Teeken tohör, wat Wilhelm grooten Spaaß maakt hett. Un van dar af an
hett he denn ok ’n akraat Hochdüütsch lehrt, wenn ok antonehmen is,
dat he mit sien Späälkameraden wiederhen platt snackt hett.
So kann man woll seggen, dat Wilhelm Busch tweespraakig groot warn
is, in beid Spraaken, in Plattdüütsch un in Hochdüütsch, weer he tohuus.
Wi all kennt Wilhelm Busch as Schrieversmann. Wi kennt siene Billergeschichten,
’n paar van siene Gedichte, köönt villicht sogar wat utwennig:
Es ist ein Brauch von Alters her – Das Gute, dieser Satz steht fest,
Wer Sorgen hat, hat auch Likör. ist stets das Böse, das man läßt!
Eins-zwei-drei! im Sauseschritt Vater werden ist nicht schwer,
läuft die Zeit! Wir laufen mit! Vater sein dagegen sehr.
Darüm weet wi natürlich, dat Wilhelm Busch keen plattdüütschen Schrieversmann
weer, keen Mundartdichter – un doch späält dat Plattdüütsche,
späält de plattdüütsche Spraak in sien Wark ’n grötern Rull, as
man glöövt. Wenn wi uns sien Wark ankieken, find wi in siene Geschichten
jümmer weer so lüttje plattdüütsche Insprengsels, so lüttje plattdüütsche
Riemels.
20