Calluna Winter18 mit Heidja

PLATTDÜÜTSCH
Poetry Slam op Platt
Dag ok, leve Lüüd,
Vundag will ik ju över en heel anner Reis vertellen. De Reis har
ehrn Anfang as de annern Touren ok. Man dütmol heff ik nich op
mien Drahtesel seten un bün toerst un toletzt nich wannert. De
Reis güng mi mien lütt Auto na Uelzen. Mien Vehikel heff ik dor
parkt, wat an Weekenend keen Problem dorstellen deit. Denn bün
ik mit de Bahn wieterföhrt na Lümborg, wo ik denn ümstiegen
möss. Dat weer ok all keen Problem. De Togg weer op de Minut
pünktli un ik kunn allerbest na de Perron Nummer fiev – dor güng
dat wieter - rövergahn. Ok vun dor güng dat kommodig wieter un
na en wieter Ümstieg mit ‘n lütt beten Töövtied bün ik al na een
un een halve Stünn in Swattenbek in Sleswig-Hosteen west. Wat
ik dor wull?!? — Nu, ik heff en Inlaad kreegen vun de Stadtbökerie
in Swattenbek, of ik ni deelnehmen wull an en Poetry Slam op
Platt – en Dichterwettstriet. Un ik wull. Keen kann dorto woll nee
seggen!? — as ik al in de Broschüür vun dat INS in Bremen »Plattdüütsch...
lehrst jümmers wat dorto« (2016) in mien lütte Opsatz
utführt harr. Ik keem dor denn also an un as wulln se mi begrööten,
keem jüstemang de Ümtogg mit de Füerwehrblaskapell vörut.
Jungedi, dat weer doch wat! Ik heff mi dat denn so’n beten bekeeken
un bün na en lütt Stück Mitgaahn erstmol in een Sietenstraat
rin — ik sull ok noch en Anroop vun Radio ZuSa kreegen.
Dor sull ik egens wat öber de Bämser Dagfahrt vertellen, de elke
Jahr in Septembermaand stattfinnen deit. Hett nich klappt. As sik
rutstellen dee, weer dor in Studio wat twei gahn un de Ersatz lett
dat Telefoneeren ut Studio nich to. Is ja jümmers beten blöd, wenn
ens op wat tövt un noch en anner Termin ansteiht. Ik heff denn
aver doch de Tövtiet mit Ropkieken op mien Texten för de Dichterwettstriet
good rümbröcht.
Un denn weer dat ok bald sowiet, alltohop dreepen wi us in en
Café un dor wöör bi en tweetet Fröhstück de Afloop un Reihenfolg
besnackt un anseggt. Süss Lüüd - süss Minuten; dat weer de Ansaag.
De en Deelnehmersche weer al heel jammerig. Se wöör dat nich
in de Tiet tohoopkreegen, se ehr Text weer en acht Minuten lange
Text, ok mit noch gauer lesen wöör dat nich gahn un, un, un.
Denn sünd wi tohoop to de groote Bühne gahn. Ik har al groote
Soorg, dat se us op de Bühn nabi oppetten laaten wulln - dor weer
allens op »Oktoberfest« in blaag un witt utstaffeert. Brrrr..., mi hett
dat schüddelt. Nu de Leit hett denn anseggt, wo dat de all loopen
sull un denn hebbt se noch de Applaus övt. Bit Öven güngt heel
good.
Denn wöör utlost, wokeen de Anfang maaken sull un keen denn
achteran siet Optritt hebben sull.
Dat Los wull, dat de »Acht-Minuten-Fru« denn ok toerst an de
Reeg keem.
Foto: Petra Kücklich
Se hett denn ok würkli övertrocken un de Leit hett dat nich
över’t Hart bröcht, se to stoppen. En anner har ok ehr Not mit de
Tiet. Aver se is ok dörchkamen, de Leit har ok dor nich inschreen.
De annern weern mit er Tiet klaar. Denn geev dat ja ok noch de
Afstimm. De harrn se opdeelt. Op de en Siet dat Hannklappen
vun de Tohörers alltohop, wat aver na mien Indruck nich so klappt
hett — dat weer bi all de Deelneehmers liek, so höör sik dat tominst
för us an. Un denn weern dor noch fiev Lüüd extra as Jury
utkeeken worrn. De sulln denn na Punkten de Slammer beurdeeln.
Un dor keem dat denn sünnerlich op an, of de Lüüd 1. allens
verstaahn hebbt un 2. of se de Inhalt toseggt hett. Dat weer
denn ja so een Saak, denn politsche Meenen sünd ja licht aftowerten.
Weer en beten snaaksch de Saak. Man dat geiht ja üm de
Darstellen vun dat Plattdüütsche un nich üm de Meen vun de een
of anner un so hebbt wi altohoop wat för de Spraak daan un ik
bün tofreden. En groote Dank ok an de Lüüd vun de Bökerie vun
de Stadt Swattenbek, de düsse Versöök plaant un dörchsett hebbt
und ik wünsch se, dat se dat bi ehr tokamen Stadtvergnögen in
2018 wedder ümsetten künnt!
Allens, wat op Platt för de saske Spraak passeeren deit, is good un
dat mütt wi all stütten! Dat is us Identität un en Deel vun us Kultur!
Niels Tümmler
58 Calluna