PIRAMUS ET TISBÉ

Piramus et Tisbé
En Babilone la cité
Furent dui home renomé,
De grant valour, de grant hautesce,
De parenté et de richesce.
5 Li riche home orent deus enfans
D’une biauté et d’uns samblans;
L’uns fu vallés, l’autre meschine;
Tant biaux n’orent rois ne roÿne.
Deus enfans orent li riche home,
10 Qu’Ovides en son livre nome
Et dist qu’il furent apelé
L’un Piramus, l’autre Tysbé.
Ancois qu’il eüssent set ans
Toucha Amours les deus enfans,
15 Et navra plus en lor endroit
Que lor aëz ne requeroit.
f. 91v col. a Li pers aëz, l’igaulz corages,
Lor grans biautez, lor grans parages,
Les paroles, li ris, li jeu
20 Et li aaisement del leu
Et li entreveoir souvent
Lor donnerent espirement.
Haÿ, Amours, devant tes iex
Ne puet durer joenes ne viex;
25 Il n’est jouvente ni aëz
Qui de ton dart ne soit navrez.
Contre ton dart n’a nulle essoigne
Double haubers ne double broigne.
Ta saiete ne set faillir:
30 Vers lui ne puet nulz homs garir;
Sans doleur fait traire souspir,
Sans sanc espandre fait palir.
Li fers de ton dart porte feu,
Souspirs la fleche dou mileu,
35 Li penon engiens et priere,
Douce amors la coche d’arriere.
Li fers navre dou regarder
Et la fleche coule el pensser,
Li penon font les apareulz,
40 La coiche ajouste les conseulz.
De tel saiete et de tel lance
Navra Amours en lor enfance
Le jovencel et la meschine,
Tresque la mort lor fu voisine.
45 Encor ne sevent riens d’Amours,
Si les a mis en grans freours.
Ja lor plaist par matin lever
Et l’un de l’autre porpenser,
34