PIRAMUS ET TISBÉ

Piramus et Tisbé
625 Tel hardement li done amour.
Quant fu issue dou palais,
Et elle devaloit em pais,
Si mist avant le pié senestre;
Puis esgarda par devers destre,
630 Senti tout le palais fremir,
Et vit la lune a empalir.
Quant ot esgardé tout entour,
Onques pointe nen ot paour
Qu’el ne parface son afaire,
635 A quel fin qu’ele en doie traire.
Ja ert desi qu’as murs venue
Quant une gaite l’a veüe,
Et quant a cele hore la voit
Cuide c’une deesse soit,
640 Trait soi arriere, ne l’apele;
Ensi s’en vait la demoisele
Devant les iex de cele guaite.
S’en ala bien par une fraite
Et vint au leu sans demorance
645 Ou fu prise la convenance.
Ja iert assise sus le marbre,
A la fontaine dessous l’arbre,
Ou il devoient assambler,
Puis se commence a porpenser
650 En quel guise elle gaberoit
Le jovenciel, qui ne venoit,
Quant uns lions de la montaigne,
Qui ot ocis une compaigne
De bestes, vint parmi les prez.
655 Encore estoit envolepez
Des entrailles et de la laine;
Abevrer vint a la fontaine.
La pucele bessa la teste
Quant vit venir la fiere beste,
660 Fuit li li sans, pert la colour:
N’est merveille s’elle ot paour.
Vait s’ent fuiant par une voie
Et crient que li lyons nel voie,
Mes tant est esbahie et simple
665 Qu’enmi sa voie laist sa guimple.
f. 95r col. b Vait s’ent isnelement mucier
Sous l’ombre d’un alemandier.
Li lyons vint a grant esfroi,
A la fontaine estaint sa soi,
670 Et quant il est bien assasez,
Si se deduit aval les prez.
Trouve la guimple en une sente,
60