PIRAMUS ET TISBÉ

Piramus et Tisbé
Li diex d’amours le me consente,
290 Ou bon me soit, ou m’en repente,
Qu’entre mes bras encor le sente
Par termes.
Ci fenirai ma plainte en lermes.
Pasmer m’estuet, ore est li termes.
295 Ensi
M’estuet faire par chascun di:
Tel fief tieng je de mon ami.’
La pucele est trois fois pasmee,
Et quant elle s’est relevee
300 Ansdeus ses mains vers le ciel tent:
Aus diex prie moult humblement
Qu’il li doignent conseil trouver
Qu’a son ami puisse parler.
Prochain furent li dui palais
305 Et par tele maniere fais
C’une parois et uns murs seulz
Estoit devise d’ambedeus.
Endroit la chambre la dedens
Ou mains conversoient de gens,
310 Ou la pucele iert enfermee,
Fu la parois un peu crevee.
La crevace n’ert gaires grans,
Si fu celee par mains ans,
Desi qu’Amours la fist trouver,
315 Vers cui riens ne se puet celer.
Quel chose est ce qu’amours ne sent?
Li dui amant premierement
f. 93r col. b Aperçurent celui pertus:
Primes Tysbé, puis Piramus.
320 Tysbé trouva la creveüre,
Prist le pendant de sa cainture,
S’en fist outre le fer paroir,
Que ses amis le pot veoir.
Piramus vint de deporter
325 Pour ses dolours reconforter.
Entre en la chambre, cele soi,
Torne ses iex vers la paroi,
Garde, si aperçoit l’enseigne
Qui la crevace li enseigne.
330 Cele part vait, prent le pendant,
Voit le pertuis aparissant.
‘Tysbé’, dist il, ‘bele faiture,
Flours de toute autre creature,
Par l’enseigne de la chainture
335 Sui je venus offrir droiture
Que ne trouvai la creveüre;
46