PIRAMUS ET TISBÉ

Piramus et Tisbé
865 Qui nous cuidiez garder leens,
A court terme serois dolens.
Com dolereuz encombremens
Verrois,
Quant ambedeus nous trouverois
870 Ensamble, mors et acolez!
Pri vous que cest don me donez:
Quant en joie fumes sevrez,
Et a mort somes dessamblez,
Seviaus
875 Que nous contiengne uns seulz tombliaux;
Andeus nous reçoive uns vesseaux.’
Adont s’encline la pucele,
Bese sa bouche si l’apele:
‘Pyramus, ves ci vostre amie:
f. 96v col. a 880 Quar l’esgardez, si ert garie.’
885
Li jovenciaux, la ou moroit,
Entroeuvre les iex et si voit
Que ce iere Tysbé s’amie
Qui l’apeloit toute esmarie.
Parler i veult, mes il ne puet,
890
Quar la mort qui le tient nel let,
Mes tant a dit: ‘Tysbé, amie,
Pour dieu, qui vous remist en vie?’
Atant se taist, ne puet plus dire,
Puis la regarde, si souspire;
895
Li cuers li part, si pert la vie,
Cele lesse toute esmarie.
Cil est mors et cele est pasmee:
Diex, quele amours est ci finee!
La pucele s’est redrecie;
900
L’espee a a deus mains sachie;
Parmi le pis sous la mamele
Se tresperce la damoisele.
D’ambedeus pars sault li sans fors,
Et cele chiet dessus le cors.
905
Le cors acole et si l’embrace,
Les iex li baise et bouche et face;
Baise la bouche par grant cure:
Tant com sans et vie li dure,
Se demoustre veraie amie.
910
Cil est fenis, cele est fenie.
Iluec morust; en tel senblant
S’assanblerent li dui amant.
Dites amen, chascun par non,
Que dieus lor face voir pardon,
Et nos face redemption
Et nos otroit beneïcon.
70