PIRAMUS ET TISBÉ

Piramus et Tisbé
M’estuet errant; ne puis parler.
Or sui hetiez, or vueil plorer,
195 Ore ai grant chault, or vueil trambler.’
f. 92v col. a Ains qu’il peüst son duel fenir
Li prist la face a empalir;
En lermes et en plorement
Cheÿ pasmez ou pavement.
200 Empres grant piece est relevez,
Tous tristes, tous descolorez,
Vait s’ent au temple Veneris,
Couche soi sus le marbre bis,
Une priere a commencie
205 Qu’ele li doinst avoir baillie
De parler a Tysbé s’amie.
Tysbé rest la dedens enclose:
Fors dou palais issir nen ose.
Souvent remembre ses amours,
210 Souvent mue le jour colours,
Souvent se plaint et sovent plore:
‘Lasse’, fet elle, ‘Com male ore
Fui nee!
Hé, diex, com male destinee,
215 Com dure vie m’est donee!
Ains mes ne fu nulle esgardee
En vie,
Qui par savoir ou par voisdie
Ne seüst engigner boisdie,
220 Fors moi.
Mes quant je plus pens et mains voi,
En quel guise prendrai conroi,
Amis douz, de parler a toi?
Parler?
225 Tysbé, fole, veulz tu desver
Et ta chastee violer
Et ton lignage vergonder?
Non faire!
Garde Raison, qui t’est contraire.
230 Ne te chaille entour toi atraire
Corage
Par quoi tu faces itel rage.
Onques feme de ton lignage
f. 92v col. b Ne fu reprise de putage.
235 Reprise?
Non serai je, par nulle guise.
Miex vueil estre cent fois ocise.
Tysbé,
Ou as tu pris icest pensé?
240 Tost as Pyramus oublié!
42