Antologjia 2010 - “Ditët e Naimit” DITËT E NAIMIT

Lediana PAJA
(SHBA)
Lediana Paja u lind në qytetin e Korçës.
Atje kreu shkollën fillore dhe gjimnazin.
Studimet e larta i vazhdoi në Universitetin
e Tiranës, në Fakultetin Ekonomik,
por në mars të vitit 2003 detyrohet t’i
ndërpresë ato për shkak të emigrimit
në SHBA. Më pas studimet i vazhdon në
Boston, në University of Massachusetts, e
njëkohësisht fillon të punojë në Departamentin
e Thesarit të Shtetit të Massachusetts.
“Lotët e Nimfes” (Rozafa, 2008) është libri i saj i pare poetik.
Dëshira dhe pasioni për krijimet letrare e ka shtyrë të shkruaj që
nga rinia e hershme, në formë të shkurtër e te gjate.
Ne vitin 2010 libri “Lotet e Nimfes” është vlerësuar me çmimin
e parë për poetet e rinj nga Shoqata e Shkrimtareve Shqiptare
“Pegasi” në Shqipëri, si dhe ka fituar një çmim special për kumtimin
e mbajtur ne Prill 2010.
Ka qenë pjesëmarrëse në konkursin e vitit 2009 nga P.E.N Club
Austria “Të flasim rreth kufijve”, ku drama e saj “Blue Star” hyri
në katërshen e dramave më të mira të konkurrimit.
Vëllimi i ri poetik “Pax Deorum” së shpejti do të shoh dritën e
botimit.
SI VALË E DETIT...
Në kurmin e mëngjesit shkelin cicërimat e zogjve
shfrenuar si litarët e një anije në bord
përkundin ankthin e varur në spango.
Shpërfillje zogjsh; harlisje ninulle, që rrëmben
duart plastike dhe i fshehin nëpër brima,
si të vërteta të mundshme të falsifikuara.
Në fetusin tokësor mbillet fara e pafajësisë
eshtrat e reve këputen si shkarpa dhe grisin pelerinat
e vertebrave të tyre, mbi horizontin rreze-munguar.
Në ecje shoh shumë hapa që ngatërrohen e bëhen nyje
rreth qendrës së shpirtit, hapa që nyjëzohen me ty,
në ty,
për ty;..
Në vendin tim thonë: kur nyja ngatërrohet, pritet.
Unë them: kur nyja ngatërrohet, lëre valën e detit
ta drejtojë vetë anijen…