Johann Friedrich Leopold Woeste - Christine Koch Mundartarchiv

40
De Pannekauken
(Von Woeste in Iserlohn aufgezeichnet)
Der wäören maol twäi Däirnkes, dä böcken sik ´n Pannekauken un
sätten ne int Finster, üm datte kaolt wären soll. Män de Pannekauken
knäip iut un laip in´n Biärg.
Dao quam iäm ´n aolt Männken in de Mäute un fraogede: „Pannkäuksken,
bao woste hen?“ – Dao sach de Pannekauken: „Ik sin twäi
Däirnkes afläopen, dëi, Männken Grëisebaort, sack äok wuol waren“,
un daomet laip hä widder.
Op en kuort quam iäm ´n Hase entiëgen un fraogede: „Pannkäuksken,
bao woste hen?“ Dao sach de Pannekauken: „Ik sin twäi Däirnkes
afläopen un dem Männken Grëisebaort; dëi, Hase Wittkopp, sack äok
wuol waren“, un daomet laip hä widder.
Üäwer ´n biëtken drap hä ´n Foß, dä fraogede: „Pannkäuksken, bao
woste hen?“ Dao sach de Pannekauken: „Ik sin twäi Däirnkes
afläopen, dem Männken Grëisebaort un dem Hasen Wittkopp; dëi,
Foß Dickstiärt, sack äok wuol waren“, un daomet laip hä widder.
Üawer ´n Wëilken modde [= begegnete] iäm ne Biëkstiärt [= Bachstelze]
un fraogede: „Pannkäuksken, bao weste hen?“ Dao sach de
Pannekauken: „Ik sin twäi Däirnkes afläopen, dem Männken Grëisebaort,
dem Hasen Wittkopp un dem Fosse Dickstiärt; dëi, Vüegelken
Biëkstiärt, sack äok wuol waren“, un daomet laip he widder.
Nao diäm quam iäm ´n Wulf in de Mäute un fraogede:
„Pannkäuksken, bao woste hen?“ Dao sach de Pannekauken: „Ik sin
twäi Däirnkes afläopen, dem Männken Grëisebaort, dem Hasen
Wittkopp, dem Fosse Dickstiärt un dem Vüegelken Biëkstiärt; dëi,
Wulf, sack äok wuol waren“, un daomet laip he widder.
Nit lange dernao quam iäm ´n Bär entiëgen un fraogede:
„Pannkäuksken, bao woste hen?“ Dao sach de Pannekauken: „Ik sin
twäi Däirnkes afläopen, dem Männken Grëisebaort, dem Hasen
Wittkopp, dem Fosse Dickstiärt, dem Vüegelken Biëkstiärt un dem
Wulwe; dëi, wille Bär, sack äok noch wuol afläopen.“
Män as hai niu födder iutnaigen well, hiät ne de Bär packet un half
oppefriäten, half es´e in de Ärde kruopen; diärümme hüelt de Süege
ok noch ümmer im Ärdbuoen.
Text nach: Henßen, Gottfried (Bearb.): In de Uhlenflucht. Plattdeutsche Schwänke und Märchen aus
Westfalen. Münster 1939. / 3. Aufl. 1952, S. 93f. [Erstveröffentlichung: „A. Kuhn, Gebräuche und
Märchen aus Westfalen, 2. Teil, Leipzig 1859, S. 235. Von Woeste in Iserlohn aufgezeichnet.“]