Johann Friedrich Leopold Woeste - Christine Koch Mundartarchiv

46
Bu Dr. Luther es innen Hiemmel kuemen
Aufgezeichnet von Friedrich Woeste, Iserlohn
(Auch die Aufregung der Reformationszeit scheint sagen
hervorgebracht zu haben, wie deren manche noch bei uns umgehen.
Eine derselben aus hiesiger Gegend verdient mitgeteilt und
aufbewahrt zu werden; sie wird folgendermaßen erzählt:)
Dao waoren maol weske Lutherske un Katholske bineen, dä
käbbelden sik üm de Religiaune. In’t leste siät eenen van den
Katholsken: „Kuatt un gued! Inke Luther, as däi stuarwen is, dao hiät
ne de Düwel sik faotens haalt. Sinner diär Tied sittet hai in der Helle.
Hai was jao nix anners wärt. Un in de Helle kuemet it Luthersken
alle!“ – Dao op siät äinen van de Luthersken: „Häört maol, Lüe! Bu
viell van uns Luthersken in de Helle kuemet, dat weet män alleene
unse Hiärguatt; dat ower Dr. Luther nitt in der Helle es, daovan we’k
ink doch en Stücksken vertellen: Maol oppen Dag küemet en dicken
Hären in de Helle. Sine Gnaoden, dai Swatte-Kasper, was selwer
gerade nit te Huse, duach was äinen van sine Knechte dao. „Bat wost
du hier, du Dickkopp?“ fraoget däi. – „Bu nu, ik woll mael saihen, off
ik bi ik wuonen sall, odder bao anners!“ – „Du läß mi, verdammt! en
driesten Gast te sien; sägg mol, Kärel, bat büste för äinen?“ – „Ik sien
Dr. Martinus Luther van Wittenbiärge, wann du’t wiätten wost!“ –
„Ah so! Dann hä’k alle fake van di hoart; män of du hier ne
Wuonninge krist, kann’k di oppen Stipp nit seggen. Maust en lück
wachten, bit uese Här nao Huse kümet. Gaoh un legg di derwile sidao
in de Ecke!“ – Dat daiht Dr. Luther. – As nu de Düwel häime küemet
un den niggen Gast gewahr wiärd, snauet hä’ne an: „Bat wost du
hier?“ – „Ik woll maol saihen, of ik bi ink wuonen sall, odder bao
anners!“ – „Sao!“ siät de Düwel un vernäögert sik so wied, dattene sik
gued bekiken kann. Dann raipet’e: „Hoho! Di Vuegel kenn’k all an
dem dicken Koppe! Du büst, verdammt! nümmes anners as dä Dr.
Luther! Hollah, Gaitlink, schiär di rut, un dat im Ogenblick! Hier konn
ve di nitt bruken. Bao sau’n dicken Kärel liät, dao konn ve met
Gemaak twee katholske Papen unnerbrengen, un dai sind us,
verdammt! laiwer asse du!“
Text nach: Süderland Heft 19-20/1930, S. 160: Bu Dr. Luther es innen Hiemmel kuemen.